之前介紹過日本版OpenRice 「食べログ」入面嘅東京拉麵同大阪拉麵，不過日日食拉麵會唔會覺得好膩？今次就帶大家睇下另一樣受歡迎嘅麵類—烏冬。
「食べログ」嘅評分方法以5分為滿分，總評分超過3.5分嘅餐廳就成為全站嘅TOP 4%，當中只有500間超過4分。以下介紹嘅烏冬店唔單止得分都超過3.6，更加係「食べログ 百名店 2017」大獎嘅得主。百名店大獎嘅主題係「想喺呢刻就品嚐到人間美味嘅話，就係呢間。」
**注意：以下7間小店成日都排長龍，建議去嗰時預鬆少少時間，並保持留意官方Twitter/Blog嘅更新，以免因為賣哂或者臨時休息而撲空！另外，大部份小店都係賣哂就會提早收舖，想去朝聖嘅話就唔好等到就收舖先去啦！**
得分：3.63
位於住宅街嘅うどん sugita係一間充滿特色嘅人氣餐廳，有唔少係其他地方食唔到嘅自創menu。店內最受歡迎嘅係「海苔ぶっかけ」烏冬，「ぶっかけ」係指煮完烏冬過冷河之後再加少量嘅つゆ(用高湯、豉油、日本酒等製成嘅調味料)調味，而「海苔ぶっかけ」就係再喺上面加咗滿滿一層紫菜。另一個人氣menu係炸烏冬「うどん唐揚げ」，咁新穎嘅菜式真係令人好想去試下！
地址：東京都目黒区上目黒2-47-5（東急東横線「中目黒」站南出口步行５分鐘）
電話：03-3719-0699
營業時間：（星期一、二、五）11:30-14:00,（星期六、日）11:30-15:00
定休日：星期三、四
座位數量：9
官方Twitter：https://twitter.com/udonsugita
得分：3.65
提到烏冬點可以唔提一下「烏冬縣」－四國嘅香川縣呢？『讃岐うどん 蔵之介』嘅師傅就曾經去咗香川縣一間烏冬店學藝5年，由2007年開始喺東京開鋪、務求將最傳統好食嘅讚岐烏冬帶比大家。店鋪對食材都好講究，採用瀨戶內海嘅鹽、北海道嘅昆布、鹿兒島嘅鏗魚片、香川嘅豉油等等。
地址：東京都豊島区高田3-7-15（地下鐵東西線「高田馬場」站6號出口步行４分鐘；
JR山手線｢高田馬場｣站早稲田出口步行６分鐘；都電荒川線｢学習院下｣站步行８分鐘）
電話：03-3987-9945
營業時間：（星期一）11:00-14:00（星期二至五）11:00-14:00, 17:00-21:00（星期六）11:30-15:00, 17:00-20:00
定休日：星期日及公眾假期（每月第一個星期一不定期休息）
座位數量：16
官方網站：http://www.udon-kuranosuke.com/
官方Twitter：https://twitter.com/udon_kuranosuke
得分：3.68
如果你係出去食飯嘅時候唔止重視食物質素、仲好重視用餐環境嘅人，就唔好錯過『根津 釜竹』喇！店鋪位於一間有過百年歷史嘅建築入面，而且有一個日式庭園。除咗視覺嘅享受之外，『根津 釜竹』提供「釜揚げうどん（かまあげうどん）」手打烏冬，「釜揚げ」係指煮完烏冬之後唔過冷河，保留表面滑捋捋嗰層澱粉，食落有軟淋淋嘅感覺。
地址：東京都文京区根津2-14-18（東京メトロ千代田線「根津」站1號出口步行3分鐘）
電話：03-5815-4675
營業時間：（星期三至六）11:30-14:00, 17:30-21:00, （星期日）11:30-14:00 （公眾假期）11:30-14:00, 17:30-20:00
定休日：星期一
座位數量：36
官方網站：http://www.kamachiku.com/
官方Facebook：https://www.facebook.com/kamachiku/
得分：3.74
因為大男店主嘅手打烏冬同埋女店主嘅家庭料理而大受歡迎嘅『手打うどん長谷川』。呢間性價比高嘅餐廳係東京米芝蓮車胎人（￥5000以下就可以食到嘅美味）推出至今，連續3年獲選做米芝蓮車胎人餐廳，食物質素有保證。『手打うどん長谷川』可以食到嘅係東京傳統烏冬－「武蔵野うどん（むさしのうどん）」，烏冬用當地嘅小麥麵粉手打製成，比一般烏冬更粗。入面最常見嘅就係加入唔同蔬菜嘅「糧烏冬」。
地址：東京都練馬区東大泉4-3-18-102（西武池袋線「大泉学園」站北出口步行４分鐘）
電話：03-3922-2626
營業時間：11:30-14:30, 18:00-20:30
定休日：星期一、每月第一個星期二
座位數量：24
官方Twitter：https://twitter.com/enzahasegawa
得分：3.80
手打うどん すみた嘅烏冬係香川縣（烏冬縣）讚岐嘅手打烏冬。由於烏冬煙煙韌韌又滑捋捋，有網民就形容呢間鋪呢烏冬係有生命嘅。（唔夾實就會走咗去架喇XD）『手打うどん すみた』亦被評為可以同香川縣媲美嘅烏冬。除咗烏冬之外，店鋪嘅好食關東煮亦為人所熟悉。關東煮用濃味醬汁煮到入曬味，用嚟送日本酒就最岩！
地址：東京都北区志茂2-52-8（JR「赤羽」站東出口步行8分鐘；東京メトロ「赤羽岩淵」站起1番號出口步行8分鐘）
電話：03-3903-0099
營業時間：（星期二至五）11:00-14:00, 18:00-21:30（星期六、日及公眾假期）11:00-15:00
定休日：星期一
座位數量：12
官方網站：http://udonsumita.com/
官方Facebook：https://www.facebook.com/udonsumita/
得分：3.95
位於舊書街神保町嘅『うどん 丸香』，係一間平實簡單但又非常好食嘅烏冬店。店主曾經在香川縣嘅烏冬發源地嘅名店『山越うどん』學師，為咗將當地美味帶畀大家，大部分嘅食材（麵粉、鰹魚、鹽、豉油等）都係來自香川縣。平實簡單嘅『うどん 丸香』，烏冬入面會唔有多餘嘅野、店鋪亦都一心一意做好烏冬，所以menu上選擇雖然較少，不過每一樣都係人間美味。而且作為學校區嘅平民食店，價格都好親民，最平￥420就有得食。
地址：東京都千代田区神田小川町3-16-1 ニュー駿河台ビル 1F（都營地下鐵、東京メトロ「神保町」站A5出口步行4分鐘；JR中央、総武線「御茶ノ水」站御茶ノ水橋出口步行7分鐘）
營業時間：（星期一至五）11:00-19:30（星期六）11:00-14:30
定休日：星期日、公眾假期、年末年始
座位數量：26
非官方Twitter: https://twitter.com/udon_maruka (雖然唔係官方，但都會更新店鋪營業資訊，可以參考下)
得分：3.95
『香川一福』係香川縣（烏冬縣）嘅名店。喺日本，鐘意烏冬嘅都會聽過呢個名。以下介紹嘅就係佢喺東京嘅第一間分店。呢間鋪頭最受歡迎嘅係咖哩烏冬，充滿鮮味嘅濃厚湯底、又彈牙又滑捋捋嘅烏冬都係令人一試難忘嘅原因。除咗講究食材同煮法之外，周到貼心嘅服務亦都係加分嘅地方。喺Facebook會時不時更新同季節相關嘅菜式，真係見到就想食！
地址：東京都千代田区内神田1-18-11 東京ロイヤルプラザ102（地下鐵「小川町」站A4出口步行6分鐘）
電話：03-5577-3644
營業時間：11:00-17:00
定休日：星期日、每月首個星期一
座位數量：34
官方網站：http://www.udon-ippuku-kanda.com/
官方Facebook：https://www.facebook.com/%E9%A6%99%E5%B7%9D%E4%B8%80%E7%A6%8F-%E7%A5%9E%E7%94%B0%E5%BA%97-402443699949780/
覺得7間太少？想睇曬東京所有入選「食べログ 百名店 2017」嘅烏冬店嘅就睇呢度啦！https://award.tabelog.com/hyakumeiten/udon/japan?pref=tokyo
About Post Author
