【食評網高票當選！】日本網民力推「大阪拉麵TOP7」大阪自由行

先前就同大家介紹過由日本美食指南「食べログ」入面總排名TOP7嘅東京拉麵，今次就帶大家稍向西移，睇下喺大阪府評分最高嘅7間拉麵店！

「食べログ」嘅評分方法以5分為滿分，總評分超過3.5分嘅餐廳就成為全站嘅TOP 4%，當中只有500間超過4分。以下介紹嘅拉麵店同樣係「食べログ百名店 2017」大獎嘅得主，得分都超過3.8，係全站所有餐廳嘅TOP4%嚟！「想喺呢刻就品嚐到人間美味嘅話，就係呢間。」你準備好未？

**注意：呢7間小店成日都排長龍，建議去嗰時預鬆時間，並不時留意官方Twitter/Blog更新嘅營運情況，以免因為完售或臨時休業而撲空！另外，大部份小店都係完售就會早收，想去朝聖嘅話唔好等到就收舖先去啊！**

7. 麺匠而今
得分：3.81

『麺匠而今』係『麺や而今』嘅分店之一，以豬骨熬成嘅湯底配上粗麵為主。雖然唔係獨特到會令人上癮嘅感覺，不過簡單而柔和嘅味道一樣吸引。配料使用由梅頭或者鴨醺成嘅「レアチャーシュー（一成熟叉燒）」，雖然個名係咁叫，不過其實唔係指佢未煮熟，而係以低溫長時間加熱製成。兩種叉燒各有特色，一致嘅係佢地都咁好食。

另外，一般食沾麵會以「スープ割り」收尾，店家會提供熱「出汁（由鰹魚花同昆布熬成嘅高湯）」比客人倒入沾麵嘅湯度，等佢地可以享用埋個湯底。但『而今』就會提供飯比客人，倒入沾麵湯煮成「雑炊（將飯煮到好似粥咁嘅料理）」，係相當特別嘅做法。

不過，有網友評論話覺得佢拉麵上嘅油脂比較多，如果係在意脂肪攝取量嘅朋友可能要留意。

地址：大阪府守口市紅屋町6-16（京阪本線「滝井」站西口步行約1分鐘；地下鉄谷町線、今里筋線「太子橋今市」站2番出口步行約7分鐘）
電話：06-6998-2888
營業時間：11:00～15:00，18:00～21:00
定休日：星期二
座位數量：6
官方Twitter：https://twitter.com/tontonjikojiko

6. 麺屋彩々昭和町本店
得分：3.82

『麺屋彩々』同『麺匠而今』唔同，係以雞熬成嘅清湯為主，主打限量發售嘅清澄鶏塩らーめん（清澄雞鹽味拉麵）。雖然都唔係咩好貴價嘅湯底，但係有網友就話好有大阪嘅味道。呢款拉麵以炭燒雞肉作為配料，但如果賣曬嘅話仲會有以叉燒做配料嘅清澄塩らーめん（清澄鹽味拉麵）可以比大家一嚐佢講究嘅湯底。

呢款拉麵會加上咗茼蒿，不過陣苦味唔係好強，有唔太喜歡茼蒿嘅網友都輕鬆完食到，唔使太擔心。

【食評網高票當選！】日本網民力推「大阪拉麵TOP7」大阪自由行 — 清澄雞鹽味拉麵每日數量有限, 想食就要早啲去喇!

地址：大阪府大阪市阿倍野区阪南町1-46-8（地下鉄御堂筋線「昭和町」站2番出口步行約1分鐘；
地下鉄谷町線「文の里」站4番出口步行約5分鐘）
電話：06-6628-5999
營業時間：11:30～14:30，18:30～21:30
定休日：不定休
座位數量：13
官方網頁：http://www.menya-saisai.co.jp/
官方Twitter：https://twitter.com/menyasaisai
官方Facebook： https://www.facebook.com/%E9%BA%BA%E5%B1%8B-%E5%BD%A9%E3%80%85-319966508045333/
官方LINE：

5. 人類みな麺類
得分：3.84

前兩間介紹咗嘅小店都已經夠近啦，離鐵路站只係1分鐘，但冇諗過「近處未算近」！
喺正阪急南方站みなみ東改札口（東南閘口）對面就係人類みな麺類，單係睇Google Map實景已經見到條長龍，但原來佢係一間有26個位嘅中型店舖，所以真係唔可以睇小。

店舖名意指每個人都係麵類，因為門口明明淨係寫住個「麵」字，但人都係會入去幫襯。佢係一間醬油拉麵專門店，以經過長時間烹調嘅極厚煮豚同特粗荀乾作招徠。當中有三種拉麵可供選擇：基本醬油拉麵「原點」、將醬油嘅多種味道都保留落嚟嘅「micro」同加上貝類熬製嘅「macro」。每樣都各有特色，啲網友食完都話會心動想試曬三種佢。

另外，Mr. Children嘅粉絲們請注意！傳說店主係Mr. Children嘅大飯，店內貼滿咗佢地嘅poster，又會播佢地嘅演唱會，相信拉麵啲名都係嚟自佢地嘅精選專輯。同為粉絲嘅你不妨體驗下喺Mr. Children嘅包圍下享用咁高評價嘅拉麵啦！

地址：大阪府大阪市淀川区西中島1-12-15（阪急京都線「南方」站對面；地下鉄御堂筋線「西中島南方」站步行約1分鐘；JR「新大阪」站步行約10分鐘）
電話：06-6309-9910
營業時間：11:00～14:30，17:30～21:30
定休日：／
官方網頁：http://www.jinrui-minamenrui.com/
官方Twitter：https://twitter.com/jinruimenrui
官方Facebook：https://www.facebook.com/jinruimenrui/

4. 燃えよ麺助
得分：3.85
作為大阪市NO. 1，當然有好多人對呢間小店都滿懷期望，咁結果梗係冇令佢地失望啦。雖然成日都有好多人排隊，但啲麵上得好快，前面嘅客人都唔會食得太慢，所以就算有人排隊都唔使擔心要等好耐。（因此，去到日本想同朋友坐底慢慢吹水就可能要快快脆食完轉場再戰啦。）

獨特嘅醬油湯底加上咗柚子去調味，令到成個湯更清爽而甜美，就算加上微苦嘅貝類都仲好美味。而佢嘅鴨肉叉燒係高溫烤焗過後即叫即切，係店內嘅招牌之一，加上傳說中嘅低溫烹調叉燒，有網友話就算要佢排成個鐘都冇所謂。

地址：大阪府大阪市福島区福島5-12-21（JR大阪環狀線福島站步行1分鐘）
電話：06-6452-2101
營業時間：（星期二至六）11:30-15:00, 18:00-21:00; （星期日及公眾假期）11:30-16:00
定休日：星期一
座位數量：10
官方Facebook：https://www.facebook.com/%E7%87%83%E3%81%88%E3%82%88%E9%BA%BA%E5%8A%A9-1660156880912031/?ref=ts
第3位：麺や紡

得分：3.88
麺や紡係一間以性價比高而出名嘅拉麵店。雖然佢同鐵路站有少少距離，但係不時都會喺店外見到人龍。主打「熟成らーめん」（濃味拉麵）同「淡成らーめん」（淡味拉麵）。「熟成らーめん」係指將雞用大火熬一晚，再加魚製成嘅濃味白湯，而麺會用自家製中粗麵。另一方面「淡成らーめん」係指將雞用細火熬，再加魚同菜製成嘅清湯，麺會用自家製幼細麵。
除咗拉麵之外，兩款湯底都有沾麵嘅選擇。其他menu仲有叉燒丼等等嘅飯類。由於店舖主張唔用化學調味料，而係以原本嘅材料帶出濃厚鮮味，所以大眾都覺得相當花功夫，值得一試。

地址：大阪府茨木市宇野辺2-1-24（大阪高速鐵道大阪モノレール線宇野辺3號出口步行8分鐘）
電話：不明
營業時間：（星期一、二、四、五）11:00-15:00
定休日：星期三、六、日
座位數量：9

第2位：らーめん鱗茨木店

得分：3.89
らーめん鱗茨木店主打鹽味拉麵，清爽嘅鹽味更加突出咗鰹魚嘅味道，同滑捋捋嘅中粗麵配搭起嚟令人食完一啖即刻想再食下一啖。除咗鹽味拉麵，店內仲有溜醤油拉麵（溜醤油：濃味豉油嘅一種，有別於普通豉油加入小麥，以大豆為主製成）。拉麵配菜可以選擇溫泉蛋同叉燒兩種。
拉麵一般比人油膩嘅感覺，但係呢度嘅鹽味拉麵就好清爽，令人想一食再食。加上雖然店面細細但唔焗促，令人感覺舒適自在。成為關西地區第二名店亦不無道理。

地址：大阪府茨木市永代町10-19 永代町壱番館 1F （阪急茨木市站步行3分鐘）
電話：072-665-8807
營業時間：11:30-14:30, 17:00-22:30
定休日：年中無休
座位數量：8
官方Twitter：https://twitter.com/uroko40

第1位：麺や而今

得分：3.89

第一位就係位於大東市嘅的麵や而今，呢間店舖有多款唔同menu，例如醤油拉麵同鹽味拉麵。由麵質、湯、配料到飲品等等都有所要求。例如麵係用日本產小麥製成嘅幼麵，麵的水份較少；湯使用日本雞、蘿蔔、昆布同鰹魚等等嘅鮮味相互相乘製成；厚切叉燒使用低溫慢煮處理等等。
麵や而今唔單止追求食品質素，更加著重同客人嘅交流。成日推出唔同嘅優惠同活動；又經常更新Twitter令客人知道有咩最新嘅menu。呢啲都會係令人想一去再去嘅原因。