最近望住日本Yen又平咗，會唔會心動想去日本呢?
今次介紹9個遊日app，涵蓋飲食、交通、購物、Wi-Fi同溝通5方面。而且係喺大約20個同類型嘅app入面揀出嚟，經過實測，確保可以簡單down到嚟用架!
飲食
1.gurunavi
去日本旅行就緊係唔少得周圍搵好嘢食啦！但係人生路不熟，又唔識睇日文⋯日本其實都有好多好似OpenRice咁嘅餐廳app，Gurunavi就係其中一個。而且佢最正嘅係有中文同英文，就算唔識日文，都可以輕鬆搵到自己想食嘅日本餐廳。
Wi-Fi
喺外地生存最基本嘅裝備當然唔少得Wi-Fi啦，以下就介紹兩個可以免費連Wi-Fi嘅app。
2.TownWiFi
佢係一個集合曬所有公眾地方入面只要簡單登入就可以連Wi-Fi嘅app，好處主要有三個：
1.一開頭set好曬就唔駛每次登入
2.幫你自動Connect wifi
3.揀附近一個最穩定嘅網絡Connect
有咗佢就會發現其實周圍都有好多Wi－Fi可以用，萬一出現Wi-Fi蛋無電，或者用曬數據嘅情況都唔怕。
3.Japan Connected-free Wi-Fi
除咗商店之外，日本政府亦都會喺各地提供Wi-Fi。用呢個app唔單止可以connect指定商鋪嘅wifi，仲可以Connect政府Wi-Fi架。而且個app入面仲有各個縣政府提供嘅旅遊資訊，出發之前都可以down定睇下目的地有咩好玩。
交通
4.香港航班資訊 (Android) / 香港國際機場航班資訊 (iOS)
最近嘅航班取消事件令人好擔心搭廉航去旅行⋯不過有咗呢個app就可以安心掌握航班取消、延誤資訊。出發去機場之前check下就萬無一失啦！萬一miss咗班機想買下一班嘅機票，都可以用目的地好快check到幾時飛日本。
5.乗換NAVITIME
日本嘅鐵路繁多複雜，鐵路名又似，就算去咗幾次都未必記得點搭車，呢個時候就可以用「乗換案内」(轉車交通指南）app查下點搭。只需要輸入依加嘅位置同目的地，就可以搵到搭咩、喺邊轉車、搭幾耐等等嘅資訊。
6.MAPS.ME
成日好擔心手機斷咗線就用唔到電話maps？下載定手機離線地圖就唔怕啦。maps.me可以比你選擇要下載嘅地區，地圖上面仲會有地區嘅基本簡介。
購物
7.コンビニどこだ？（便利店在哪裡？）
去過日本旅行都知日本好多地區嘅商鋪都喺夜晚8點左右就休息，夜晚想買嘢食嘢飲就唔少得去24小時營業嘅便利店喇。想知附近有咩便利店嘅話呢個app就啱哂，一開頭set好想去嘅便利店，之後開返地圖就會顯示附近邊度有邊間便利店。
8.dokodemo
去日本買嘢固然好開心啦，不過因爲睇唔明日文而買咗啲唔啱用嘅嘢返屋企；又或者望住日本yen分唔到嗰樣嘢到底抵唔抵買呢啲情況都可能出現。用呢個app掃一掃個bar code就可用中文或者英文睇到商品嘅簡介同用港元比較唔同鋪頭嘅價錢。
溝通
9.日本旅遊會話一指搞定
雖然依加係日本旅遊區用英文/普通話都溝通到少少，但係如果去偏遠少少嘅地方嗰陣，可以用簡單日文同日本人講下嘢就好喇。用呢個app可以學到日常生活常用嘅單字同句子，仲有埋日文字同真人發音。萬一學唔切都可以播出嚟比日本朋友聽！
About Post Author
