日本出入境違禁品｜港人去日本旅行，通常都想帶特色野翻香港做手信，例如日本生果及刀等。今次為大家整理日本機場出入境，同香港機場入境嘅海關規定，大家買手信時就可以作為參考，免得被充公啦！
更多遊日實用資料： 11間航空公司免費行李託運重量表｜ 日本上機 hand carry違禁品清單
日本出入境違禁品｜入境時有甚麼不能帶上機/需要放Hand Carry？
1. 大量現金
日本海關規定，入境時攜帶現金、旅行支票、有價證券總值100萬日圓以上，或黃金（純度90%以上）達1公斤以上時，須辦理申報手續。
2. 鋰電池不能托運，必需放在手提行李
根據日本2017年7月1日嘅新例，當乘客將電子用品寄艙時，一定要完全關機，即使是睡眠模式或飛行模式都不能接受。一旦被發現違規，最高罰款為50萬日元。而且，電子用品需妥善保護好，例如用衣物包住、放入公事包作緩衝。而外置備用鋰電池（包括尿袋）同以往一樣，一定要放於手提行李之內。
其他要注意的物品：
3. 直髮器
根據日本民航局之規定，當局對於捲髮器的運輸實施了新的管制。
如該捲髮器的鋰電池可從機身取出，該捲髮器可於取出電池後以隨身或托運行李運送，而取出的鋰電池不得超過160Wh並放置於隨身行李內。否則，所有以鋰電池發電的捲髮器均不能登機（包括放置於寄艙及隨身行李內）。
然而，以電源插座以及乾電池發電的捲髮器則不被分類為危險品，乘客可攜帶此類捲髮器登機而沒有額外的管制。而以氣體操作之捲髮器，由於該設備會有機會釋放烴氣，乘客需確保設備中的發熱部分完全地被覆蓋方可攜帶（包括放置於寄艙及隨身行李內）。
4. 肉類製品
由海外攜帶動物產物入境日本時，所有肉品類（無論係生鮮、冷藏、冷凍或已加工製品），都係動物檢疫對象，有可能被充公，大家盡量就唔好帶去日本喇。
| 不能入境： | 易燃物、易燃液體及易燃爆炸物 |
| 只可hand carry： | 鋰電池（包括尿袋）、電子煙、點煙打火機、等發熱物品 |
| 只可寄艙： | 兇器類物品、尖銳物品 |
在日本離境時，有甚麼不能帶出境/需要放Hand Carry？
如果你鐘意喺日本買生果、甜品或海鮮翻香港，就要特別留意下日本同香港嘅海關規定喇。即使日本帶得出境，都未必可以帶入香港境內㗎！
食物類
1. 海鮮
如果已經煮熟，係可以帶出日本境外嘅，而香港海關也容許帶熟海鮮入境。不過，部分日本海產如沖繩海葡萄、明太子，雖然日本容許帶出境，而香港又無明文規定唔可以帶入境，但始終係含水食物，都係帶少量出境為妙。
2. 蛋
未煮熟嘅蛋、部分煮熟嘅蛋都唔可以帶入香港境內。記得唔好再買流心蛋飯團翻香港喇！
3. 米
如果要買米，香港規定超過15分斤食米，就要申請進口許可證。
4. 蔬果
香港海關對水果無特別入境限制，所以日本多數水果都可以帶翻香港。而香港對於蔬菜入境都無特別入境限制，但要注意嘅係，由於產量少，日本禁止帶沖繩紅薯出境。
5. 拉麵、杯麵
不少人都會忽略麵類嘅手信問題。由於日本部分拉麵，會附有液體湯包，幾包加起來可能超過100毫升，大家記得要寄艙啦！
6. 零食類
由於液體管制規定，啫喱、布甸、奶凍類望落係固體，但其實係凝膠食品，最好就寄艙喇！
7. 生肉
日本和香港嘅海關，都不容許帶生肉進出境內。
8. 酒類
日本對酒出境無限制，但香港海關只准每位年滿18歲嘅旅客，免稅攜帶1升攝氏20度溫度下量度，所得酒精濃度以量計多於30%嘅飲用酒類進入香港，供本人自用。
非食品類
1. 煙草
日本出境時，在免稅店買煙草製品是沒有數量限制。不過，香港入境時限每位年滿18歲嘅旅客，免稅攜帶19支香煙、或1支雪茄（如多於1支雪茄，則總重量不超過25克）、或25克其他製成煙草。
2. 妝品
所有超過100ml、或容器容量大於100ml的液體製品，如液體、凝膠及噴霧煩物品，記得要寄艙！
3. 利器類
部分人去日本會買武士刀、木刀、手裡劍等，所有武器物品都不得隨身攜帶登機，只可寄艙。
圖片來源：ichiran、kansai airport、Japan National Tourism Organization
About Post Author
