生日，係同至親分享喜悅嘅時間。鐘意遊日嘅你、喺日本人返工返學嘅你，有冇諗過喺日本度過一個難忘嘅生日？
今次就為鐘意周圍玩嘅朋友介紹12個有生日優惠嘅遊玩設施，當中包括主題樂園、商店同電影院，有唔少仲係生日當日免費入場！唔好錯過大玩特玩嘅好機會喇?
～東京地區～
1.東京joypolis
Joypoils係日本最大嘅室內主題樂園，由SEGA開設嘅樂園充滿未來同電子元素，仲會同唔同動漫作品合作。園內有20樣以上嘅遊玩設施，無論係大人定小朋友，都會玩到流連忘返。想知多啲有咩玩嘅可以睇下Joy嘅介紹。
【生日特別待遇】免費入場及遊玩設施免費任玩、嘉年華遊戲免費券一張、¥300館內優惠券。
另外，生日月亦可以優惠價購買入場券：
大人（18歲或以上）￥4300→￥3800 ；
小學生／中學生 ￥3300→￥2800
東京ジョイポリス （東京joypolis）
地址：東京都港区台場1丁目6番1号 DECKS Tokyo Beach 3F～5F
生日優惠介紹（官網）：tokyo-joypolis.com/ticket/birthday/
優惠使用條件說明：喺生日當天或者生日當月來館嘅顧客，出示可以證明生日日期嘅物件（例如車牌、passport、保險證等）後即可享有上述優惠。
2.東京ディズニーランド 東京迪士尼樂園
東京迪士尼樂園同埋Disney Sea，相信都唔洗多作介紹。雖然迪士尼無推出生日免費嘅優惠，但係就提供20幾種生日特別待遇。當中有唔同主題，例如係為親友帶嚟驚喜、成為當日嘅主角、同迪士尼角色見面、留下美好回憶等等。
【生日特別待遇】生日限定版e-ticket/入場券、生日特別週邊商品、免費生日貼紙、生日影快相服務等等。
東京ディズニーリゾート （東京迪士尼渡假村）
地址：千葉県浦安市舞浜1-1
生日特別待遇介紹（官網）：www.tokyodisneyresort.jp/special/happiest_birthdays/
3.戲院
旅行睇戲，無論睇嘅係日本先睇到嘅戲，定係平時睇開嗰啲都好，都總覺得別有一番風味；就算去完旅行返到香港，見到套戲就會諗返起旅行嘅點點滴滴。唔少日本戲院都有睇戲優惠時段，以下介紹東京嘅兩間，有時間不妨試下喺日本睇返套戲。
【「吉祥寺劇院」生日特別待遇】在生日月在以優惠價¥1,100觀賞電影。
地址：東京都武蔵野市吉祥寺南町2-3-16
電話：0422-48-6521
生日優惠介紹（官網）：cinemaodeon.jp/
【「UPLINK」生日特別待遇】在生日的日期（任何月份）當日可以優惠價¥1,000觀賞電影。（最多兩位同行者也可用優惠）
地址：東京都渋谷区宇田川町37-18 トツネビル1階
電話：03-6825-5503
生日優惠介紹（官網）：www.uplink.co.jp/movie/info#info2
注：1號出生人士（由於戲院喺每月1號有提供優惠），所以生日優惠會喺每月2號；31號出生人士，喺沒有31號嘅月份可於30號享有優惠
29, 30, 31號出生人士，喺2月可於28號享有優惠
4. 八景島Sea Paradise [橫濱]
四面環海嘅八景島Sea Paradise係日本最大級別嘅水族館主題樂團。有15種刺激好玩嘅機動遊戲、4個唔同主題嘅水族館、仲有餐廳同酒店。定期舉行嘅文化體驗活動同表演亦都不容錯過。
【生日特別待遇】生日當日及前後3日嘅7日內，可以用優惠價購買門票，仲送喺園內購物、用餐嘅優惠券！（生日優惠有效期為2017年3月1日～2017年11月30日）
水族館門票優惠價：
大人 ￥3,000 →￥2,700
小‧中學生￥1,750 →￥1,580
幼童（4歲以上）￥850 →￥770
長者（65歲以上）￥2,450 →￥2,210
One day pass優惠價：
大人 ￥5,050 →￥4,400
小‧中學生￥3,600 →￥3,200
幼童（4歲以上）￥2,050 →￥1,800
長者（65歲以上）￥3,600 →￥3,200
近期舉行嘅幻光表演
横浜・八景島シーパラダイス（八景島Sea Paradise）
地址：神奈川県横浜市金沢区八景島
生日優惠介紹（官網）：http://www.seaparadise.co.jp/coupon/birthday_regular.html
優惠使用條件說明：請出示能證明出生日期嘅物件
～關西地區～
5.USJ 日本環球影城 [大阪]
今年夏天USJ同少年Jump合作（活動去到10月1號）
日本其中一個最受歡迎嘅主題樂團，除咗固定園區之外仲成日同唔同動漫合作推出期間限定體驗。生日優惠每個人平幾百Yen，同親友一齊去嘅話加加埋埋都慳唔少架！
【生日特別待遇】生日月以及後一個月可利用優惠價購買壽星同最多5位同行者嘅生日門票；免費獲贈生日貼紙；到部分餐廳用餐可享優先服務，並可予約特製生日蛋糕
Birthday one day pass：
大人(12歲以上) ￥7,600 →￥7,100
小童（4-11歲）￥5,100 →￥4,700
Birthday two day pass：
大人(12歲以上) ￥12,800→￥11,800
小童（4-11歲）￥8,620 →￥8,020
園內職員見到貼紙就會向你祝福！
ユニバーサル・スタジオ・ジャパン® （日本環球影城）
大阪府大阪市此花区桜島2丁目1番33号
生日優惠介紹（官網）：www.usj.co.jp/enjoy/birthday.html
優惠的使用條件說明：需要由壽星喺網上登記成為USJ Club會員再買one day/ two day pass
6.梅田sky building 空中庭園展望台 [大阪]
總係憧憬住可以同至愛一齊望住個日落，靜靜地度過特別嘅時刻。喺梅田sky building展望台就可以一覽大阪嘅景色，由日落睇到月出。
【生日特別待遇】生日當日免費入場，同行者（最多4位）8折；餐廳、商店優惠券
夜景好靚，可以喺生日嗰日同最親嘅人一親欣賞一定會畢生難忘。
梅田スカイビル「空中庭園展望台」(梅田sky building 空中庭園展望台)
地址：大阪市北区大淀中1-1-88 梅田スカイビル
生日優惠介紹（官網）：www.kuchu-teien.com/observatory/campaign/
7.志摩西班牙村 [三重]
西班牙村顧名思義係以西班牙做主題嘅主題樂園。樂園入面以當地嘅地貌作原型、遊玩設施同表演都充滿西班牙嘅熱情色彩。想悠閒享受異國風情又得；想喺異地找尋激烈機動遊戲嘅刺激都得。
【生日特別待遇】生日當日免費入場及遊玩設施免費任玩；入場時可獲生日貼紙，人物角色見到貼紙會提供生日祝福
志摩スペイン村 （志摩西班牙村）
地址：三重県志摩市磯部町坂崎
生日優惠介紹（官網）：www.parque-net.com/parque_espana/information/ticket.html
優惠使用條件說明 ：需要車牌、保險證等證明生日日期；樂園休息日除外
～九州地區～
8.福岡塔
福岡塔係日本最高嘅海濱塔，上到去唔單止可以360度睇福岡繁華嘅光景；仲可以一望無邊無際嘅汪洋大海。
【生日特別待遇】生日當日免費入場、送生日卡，餐廳8折優惠（最多4人）
福岡タワー（福岡塔）
地址：福岡市早良区百道浜２丁目3番26号
生日優惠介紹（官網）：www.fukuokatower.co.jp/otoku/birthday.php
優惠使用條件說明 ：需要提供可以證明生日日期嘅物件（例如車牌、學生證、passport等）
9.豪斯登堡 [長崎]
樂園名稱嘅來源係荷蘭王室嘅官邸－豪斯登堡宮。園區周圍都係模仿荷蘭、以至歐洲風格嘅建築。由於喺樂園入面就靚到好似去咗異國皇宮咁，所以亦成為拍攝取景地。豪斯登堡會定期舉行唔同主題嘅活動，例如花季嘅玫瑰展、古典樂、歌劇等等嘅表演。
【生日特別待遇】4歲以上人士喺生日當日同前後3日入場，登記可獲生日貼紙；去到各個設施嘅時候，職員見到貼紙會提供生日特別待遇；到部分商店購物會有生日優惠。
最近仲有全九州最大規模嘅品酒節，可以一嘗嚟自世界各地嘅700種酒。
ハウステンボス （豪斯登堡）
地址：長崎県佐世保市ハウステンボス町1-1
生日優惠介紹（官網）：www.huistenbosch.co.jp/guide/service/happybirthday.html
～多個區域適用～
10.Fantasy kids 渡假村
Fantasy kids 渡假村係以12歲或以下嘅小朋友同埋家長做對象嘅日本最大室內遊樂場。喺大約3300平方米嘅闊落空間，同小朋友一齊坐電動車、活動身體、整手工等等。促進體能、創造力發展嘅同時培養親子關係。
【生日特別待遇】1-12歲（小學生或以下）的小童在生日月內可無限次免費入場
ファンタジーキッズリゾート （Fantasy kids 渡假村）
東京店：〒208-0023 東京都武蔵村山市伊奈平3-36-1 ダイエー武蔵村山店2F
另外喺千葉、神奈川、福岡、愛知以及北海道都有分店。
店鋪詳情：www.fantasyresort.jp/shop
生日優惠介紹（官網）：www.fantasyresort.jp/shop/birthday
優惠使用條件說明：到訪時請務必帶同可以確認小朋友生日日期嘅物品，入場時向工作人員出示。
11. Round1
喺日本想做運動、想打機，或者同班friend一齊唔知去邊好嘅時候，去Round1都係一個好選擇。喺Round1可以打保齡、棒球；玩飛標、音Game；甚至唱K都得。喺日本全國都有分店，加上價格合宜，值得一去。
【生日特別待遇】生日當月可獲免費記念照片拍攝券和挑戰生日特別遊戲
株式会社ラウンドワン (Round1有限公司)
〒590-0985 大阪府堺市堺区戎島町四丁45番地1 堺駅前ポルタスセンタービル
店鋪詳情：www.round1.co.jp/shop/area01.html
生日優惠介紹（官網）：www.round1.co.jp/service/bowling/birthday.html
優惠使用條件說明：最少一日之前用電話預約，預約時注明係「生日予約」；當日予約將不被受理；需攜帶可以證明生日日期嘅物品確認
12.寵物小精靈中心
遊日去寵物小精靈中心相信係一眾小精靈訓練員嘅指定動作。見到一隻隻可愛嘅小精靈，真係忍唔住抱起佢地、甚至帶佢地返屋企！如果有玩「寵物小精靈 太陽與月亮」就唔好錯過呢個生日優惠喇。
【生日特別待遇】比卡超、伊貝或花療環環其中一隻小精靈 (喺寵物小精靈 太陽與月亮，ポケットモンスター サン・ムーン入面)；生日皇冠；生日卡；95折購物優惠
株式会社ポケモンセンター （寵物小精靈中心）
地址：東京都港区六本木6-10-1 六本木ヒルズ森タワー8F
店鋪詳情：www.pokemon.co.jp/gp/pokecen/?inc=gnav
生日優惠介紹（官網）：www.pokemon.co.jp/g
優惠使用條件說明：帶可以證明生日日期嘅物品作確認；優惠嘅時段為生日月內，例如：8月25日生日可以喺8月1日至8月31日享有優惠。
資料來源：matome.naver.jp
About Post Author
