喺啱啱完結咗嘅世界大學生運動會（世大運）中，受人注目嘅除咗有喺競技場活躍嘅選手外，仲有去觀戰嗰時幫手執垃圾嘅日本學生們。
就喺23號嘅美日棒球賽完結之後，幾位愛媛大學嘅學生主動執拾觀眾們留低嘅垃圾，保持返場館清潔。3日後，又有來自日本嘅足球選手都主動去咗選手村附近嘅公園幫手打掃。佢地喺今次世大運嘅善舉引嚟多方面嘅稱讚，被台北議員蔡淑君放咗上Facebook之後2日已經引嚟超過5000個likes，網民仲紛紛表示佩服。
對於呢件事，有日本網民睇到之後就虛心回應話日本人係以打掃去表達佢地嘅謝意。
喺Yam蕃薯藤嘅報導中都有提及到，佢地會自發執垃圾只係單純覺得「呢度係比小朋友玩嘅地方，唔應該咁污糟。」不過講起日本人呢個舉動，其實已經唔係第一次㗎啦！2014年世界盃嗰時，日本隊雖然輸咗比科特迪瓦，但一班日本球迷自發留低清理好場地嘅垃圾。呢件事無論喺日本國內外都好大迴響，甚至影響到2年後嘅FIFA世界盃預賽嗰陣，沙特阿拉伯隊輸咗比日本之後，佢地嘅球迷都主動清理垃圾。
（翻譯：日本代表vs沙特阿拉伯 比賽後，沙特阿拉伯人清理咗垃圾。場比賽好正呀。多謝你地。 截自東京沙特阿拉伯學生會Twitter）
但原來早喺1998年日本第一次出戰世界盃嗰時，日本球迷已經有就算輸咗波都會幫手執返靚個場地嘅好習慣。相信佢地嘅表現，會係日本公民教育成功嘅證明之一。
可能大家去開日本嘅時候都會留意到條街冇咩垃圾筒，但係成個國家都仲係好乾淨，唔會周圍都係垃圾。呢個係因為佢地習慣帶垃圾返屋企再分類棄置，為環境出一分力。事實上，日本喺垃圾分類一事上面都做得相當嚴謹，唔單止有法律規管，只係一本垃圾分類手冊就已經有幾十頁，如果唔小心喺錯嘅日子掉咗唔啱嘅垃圾仲會比人彈返轉頭！管制底下大部份日本人都唔會隨便比啲垃圾就咁棄置喺條街度，出街都會帶定個細細地嘅垃圾袋去裝返自己嘅垃圾。
（兵庫縣西宮市同愛知縣豐橋市嘅垃圾分類及棄置手冊，入面清楚寫明唔同垃圾嘅分類同棄置方法、市內唔同地區收集垃圾嘅時間同查詢電話，總共30幾頁）
另外，教育都係好重要嘅一環。日本人喺求學期間除咗會學到唔同有關環保嘅知識以外，仲會去參觀垃圾處理廠，由細開始令佢地明白要減少廢料、回收同垃圾分類嘅重要性。再加上家長平時嘅身教，將日本人對棄置垃圾嘅好習慣承傳落去，所以即使只係大學生都已經有意識去自發保護環境，無論佢地身在日本與否。
當然，日本當地都係會有一啲冇公德心嘅人，破壞到社區環境。呢次大學生們嘅善舉被廣泛報導後，都有網民笑言「喺日本都咁做啦！」
喺日本又真係有唔同義工團隊得閒就幫手執下垃圾，或者居民一般都會清潔下自己所住既地區㗎。當中就以greenbird最出名，佢地喺全日本甚至全世界都有街道掃除小組，不時會組織義工活動去執靚個社區，部份地區仲係定期清潔添。
（greenbird主頁，介紹咗佢地喺全球嘅小組）
About Post Author
