最愛日本筆！2017LOFT熱賣文具榜

你筆袋入面嘅筆，有幾多支係日本出產的呢？

日本文具一向都以高質耐用而受歡迎。今次就帶大家睇睇大型連鎖生活雜貨店LOFT嘅熱賣文具（筆類）榜(8月份計)，睇下有D咩筆最受日本人喜愛。鐘意嘅話下次去日本就可以帶佢地返屋企喇！

10.S20 0.5mm 鉛芯筆 ¥ 2000+税

第十位係唯一一支上榜嘅鉛芯筆。用天然樺木造嘅筆幹、低重心嘅特別設計令S20打出名堂。雖然¥2000買一支筆感覺有D貴，但係S20絕對物超所值，而且鉛芯筆嘅壽命長，如果keep得好可以用一世架！

9.SUPER PETIT 中字0.6mm 墨水筆 ¥ 100+税

同第7位嘅墨水筆同款。0.6mm用係店鋪宣傳或者標示重點都好適合架！

8.PURE COLOR 墨水筆 ¥ 100+税

想用墨水筆畫畫但搵唔岩色？PURE COLOR 墨水筆可以解決呢個問題。一支筆有兩個粗幼度，總共有36隻色！無論係小朋友畫畫，學生寫筆記定係放係office都一樣適合。

7.SUPER PETIT 細字0.4mm 墨水筆 ¥ 100+税

墨水筆嘅好處係寫字唔駛用力，但係用墨水筆嘅時候成日都好怕會整花左D墨或者唔小心整到水。抗水性嘅SUPER PETIT 墨水筆就無呢個問題。而細字0.4mm 嘅用途廣泛，唔單止可以寫字，更加係畫畫嘅必須品。

6.ENERGEL 0.5mm 水性原子筆芯 ¥ 80+税

唔知你仲記唔記得之前嘅DIY啫喱筆風潮呢？可以簡單將筆殼同筆芯自己組合，整一支獨一無二嘅筆。第六位嘅ENERGEL 0.5mm 水性原子筆芯就係PENTEL嘅DIY啫喱筆筆芯，因為書寫流暢而深得用家喜愛。

5.PILOT 0.5mm 可擦原子筆 ¥ 230+税

可以擦得甩嘅原子筆係十年前推出以黎一直都好受歡迎。十周年，今年就推出左特別版，由圓點、直線等幾何圖形等設計而成。今年7月1日開始限量發賣，有興趣嘅文具迷要注意喇！

4.SK-0.7 0.7mm 油性原子筆芯 ¥ 60+税

一支筆用哂D墨之後，最好緊係可以換筆芯再用啦，環保得黎又可以慳返D錢。呢隻筆芯可以係Zebra CLIP-ON SLIM、CLIP-ON MULTI、SK-SHARBO+1等等總共15種筆度用。質量有保證之餘價錢又實惠，買筆果時買埋就最方便喇！

3.CLIP-ON SLIM 3C三色原子筆 ¥ 300+税

同兩色原子筆同款嘅三色原子筆都登上左排行榜，多左隻色但係都係一樣咁幼架。咁就有更多選擇啦！

2.CLIP-ON SLIM 2C兩色原子筆 ¥ 250+税

如果要輕便咁隨身帶住一支筆，CLIP-ON SLIM 嘅多色原子筆一定係最好嘅選擇。

一支筆可以有黑、藍、紅、綠入面嘅其中兩隻色；直徑只有10.8mm嘅佢比一般兩色原子筆幼，無多色原子筆筆身粗而不便於收納嘅問題。筆身更加用左可再生物料製成，係注重環保嘅好選擇。

1.PROPUS WINDOW螢光筆 ¥ 100+税

排第一嘅PROPUS WINDOW螢光筆嘅特點就係係筆頭有特別透明設計，令你係間緊果時更容易睇清楚間到邊。除左傳統嘅紅橙黃綠藍，佢仲出左偏淺嘅顏色，直接間落鉛筆字度都唔怕睇唔清啦！

如果想知更多熱賣嘅筆，可以上LOFT嘅網站睇睇：