著制服＝警察＝好人；紋身漢＝黑社會＝壞人；打機＝廢青＝毒…社會上充斥住好多毫無根據嘅標籤，影響住所有人嘅思考模式，其實依啲所有嘢，到底可以由邊個去定義？網名悲傷的小魚的阿Wing從中學一年級開始睇動畫，每日睇到半夜兩三點；到中四中五就開始玩日本嘅文字遊戲，日文愈練愈精，自學日文考N1，輕輕鬆鬆攞高分。
雖說打機打到精通日文好厲害，但始終打機＝毒嘅印象深入民心，阿Wing都話：「我阿哥都成日話我好毒！」不過阿Wing話佢唔會介意人地點睇自己，「你自己覺得自己毒唔毒先係最重要！」雖然每日阿Wing一放學就返屋企打機、或者去遊戲中心、同朋友去玩等等，其他人都覺得佢好宅，但阿Wing就覺得自己每日都做緊只有喺日本先做到嘅事，笑說：「其實我覺得自己很充實～」
唔知係咪因為《電車男》嘅關係，好多時大眾都覺得成日玩online game嘅人不善辭令，但阿Wing就解辭根本就唔係咁：「我打online game認識到好多朋友，每日大家一齊玩online game，玩咗成年左右，終於開咗線下會。可以喺二次元遊戲中認識到三次元世界嘅朋友，就係作為打機人最大嘅樂趣～」
諗起以前喺香港成日都躲喺爸爸媽媽後面，好多嘢都唔會自己做，家務事更加懶理。不過嚟日本之後，所有事都要自己做，阿Wing亦都成長咗唔少。「有時親戚會同我講，覺得我說嘢多咗自信多咗，我自己都覺得我嚟日本係真係有個意義喺到。」
其實以前阿Wing讀IVE嗰陣已經開始接觸免費遊戲同歌詞翻譯，所以而家都係以做翻譯為目標，打算喺日本大學畢業之後，就會搵翻譯嘅工作。阿Wing覺得：「可以將自己喜歡嘅嘢翻譯畀其他人知道，同大家分享自己喜歡嘅作品，覺得很自豪！」不過阿Wing就冇諗住要留喺日本搵工，而係諗住返香港：「其實我都覺得係時候返去爸爸媽媽嘅懷抱啦，同埋始終我覺得都係屋企最好。」
About Post Author
