1944年今日日本於塞班島戰役發動「萬歲衝鋒」！

除咗1937年7月7日嘅「七七事變」外，「萬歲衝鋒」於近代嘅7月7日都算係一件非常有名嘅「事件」。事實上「萬歲衝鋒」喺二戰史上的確為交戰雙方都留下咗印象深刻嘅一幕。

話說於太平洋戰爭當中，美國採用跳島戰術試圖加快進攻嘅效率，而日本面對美國海軍陸戰隊登陸後嘅攻勢，日軍經常都會以「萬歲衝鋒」作為最後「玉碎」嘅手段。

嗱，睇清楚係「玉碎」，唔係「肉碎」喎。所謂「玉碎」喺呢度就係指「全軍戰死」咁解。由於日軍係主張「不投降，不被俘」(呢種精神於1941年戰陣訓已經有提及)。所以佢哋去到最後關頭，冇增援、冇物資、冇勝望時，就會採用「萬歲衝鋒」呢種「玉碎」嘅手段。到時日軍就會將日本軍軍旗綁上膀頭，頭上綁上象徵日本國旗的紅圓點白布帶，一齊大叫「天皇萬歲」就攞步槍刺刀或者武士刀衝出去同美軍死過！

而整場太平洋戰爭當中，塞班島嘅「萬歲衝鋒」都算係規模數一數二嘅一次，於7月6日夜晚到7月7日，日本帝國陸軍第43師團死剩嘅四千幾人一齊發動「萬歲衝鋒」，美軍第105步兵師第1、2營幾乎畀人殺到全軍覆沒，損失650人。雖然最後都係美軍得到最後勝利，不過代價都幾大下，登陸部隊當中有近3000人戰死，過萬人受傷，而日軍包括「萬歲衝鋒」嗰4300人共有超過30000人戰死，而另外亦有超過20000名島上日本居民死亡。