講到史上最佳嘅籃球漫畫，相信10個人10個都會話係井上雄彥嘅《男兒當入樽》(Slam Dunk)。
無他嘅，除咗劇情夠熱血，入面嘅角色性格鮮明，無論係籃球隊嘅成員，抑或櫻木軍團，總會搵到一個你鍾意嘅角色。
小編就最鍾意後衛宮城良田。
如果鍾意宮城嘅，相信都會留意到佢左耳係有戴耳環，不過至於佢點解要戴呢？係漫畫正傳入面就冇提及過。
只不過井上雄彥喺1996年畫完《Slam Dunk》之後，喺1998年就畫過一個關於宮城良田嘅短篇故事《耳環》
故事係講年少嘅宮城良田喺海邊山洞建立秘密基地，等候哥哥出海捕魚返嚟嘅故事。
當時嘅宮城嘅頭髮仲未恤上去，唔知點解望落有少少似翔陽嘅藤真…
喺佢等候哥哥嘅時候期間仲遇到一個叫綾子嘅女仔。
至於劇情就唔劇透太多，感覺個故仔同《Real》一樣，有啲灰灰地同悲涼嘅感覺，仲講咗少少宮城嘅家庭背景。
另一方面，漫畫入面有講到點解宮城要帶耳環，我諗同千千萬萬個打籃球嘅人一樣，受咗一個人影響。
就係波神米高佐敦(Michael Jordan)！
「因為米高佐敦有戴，所以我都要戴！」
今時今日仲有唔少人因為米高佐敦(又或者係G Dragon同Fisherman Lok)而去追Air Jordan，但當年宮城就確確實實因為波神而戴耳環！
對呢篇漫畫有興趣嘅只要搵google大神輸入 「井上雄彥 耳環」，頭幾個結果就係，鍾意Slam Dunk嘅不妨睇下！
About Post Author
