有聽開JPOP嘅朋友對SEKAI NO OWARI一定唔會感到陌生！以華麗嘅舞台效果及夢幻嘅曲風及歌詞吸引歌迷注意，出道至今已經推出多首人氣作品，包括將人生比喻為遊戲嘅電音樂曲、《蠟筆小新》劇場版主題曲《RPG》，與荷蘭人氣DJ合製嘅《Dragon Night》等。
不得不提嘅當然係主唱Fukase嘅經歷同故事更加為樂隊添上一點傳奇色彩，因為佢青少年時期曾受精神病影響而入過精神病院，渡過咗非常艱難嘅時期後靠音樂找回佢嘅人生，並因此聯絡返兒時好友共組樂隊。因此，樂隊命名為「世界末日」，因為Fukase覺得喺佢以為人生要完結嘅時侯搵番重生嘅動力（音樂同好友），所以完結亦都係一個開始。
今次已經係佢哋第四次嚟香港，對上一次係11月嚟大型戶外音樂節Clockenflap擔任壓軸嘉賓。嚟過咁多次，今次終於可以單獨開Live，Nakajin都話佢哋真係非常開心。
Nakajin：舊年嚟Clockenflap都有好多人嚟特登嚟支持我哋，大家都玩得好開心，所以我哋都好期待今次嘅單獨live！
Saori：我哋仲準備咗為香港歌迷特製嘅短片，大家敬請期待！
被問到有冇掛住香港啲咩嘅時候，佢哋竟然答係山頂纜車！
Fukase：真係好好玩，因為個陣得Saori坐係度，但架車其實真係好斜好斜。我覺得企係度仲刺激好玩！
之前為《進擊的巨人》電影版主唱「ANTI－HERO」，今次嘅新歌「One More Night」又係全英文作詞，到底佢哋覺得用日本同英文作曲作詞嘅最大分別係咩呢？
Fukase：因為我哋唔識講地道英文，母語亦唔係英文，所以唔知大家點睇啲歌詞。我哋都要乖乖地同監製合作，所以多咗好多同其他人一齊諗一齊創作嘅機會。
Saori：「One More Night」係我填詞嘅，但一開始都完全填唔好，寫來寫去都唔係個種感覺。最後監製拎咗支Whisky出嚟叫我飲，所以我哋係一齊飲酒一齊填詞㗎～
由主流出道至今經歷咗咁多轉變，唔知佢哋覺得自己最大嘅變化係咩呢？
Nakajin：我就覺得雖然我哋都有變，但我哋屋企人都變得好犀利！出道當時都唔會話太熱衷，但而家真係好熱心咁睇我哋嘅你演唱會，每場都一齊嚟睇！聽日都會從日本嚟向香港睇呢！
Fukase：唔止呀，我媽媽每次嚟都係同一個打扮，真係好搶鏡架！佢會拎住好多好耐之前出嘅goods，唔係好耐以前鍾意我哋嘅fans都未必有，然後一路舉起，一副好似「我支持咗你哋好耐架啦」咁！不過佢係我阿媽，梗係好耐之前已經識我哋啦！
Saori：我爸爸都係，有一次Nakajin喺演唱會上講過，咦今日係Saori爸爸生日喎！然後唔知點解一萬人入面我爸爸真係出現咗係鏡頭面前，自此每年都會有fans記得我爸爸生日，而且仲認得佢會同佢影相添！佢都好開心呀（笑）
SEKAI NO OWARI成員之間相處融洽其中一個大原因就係因為佢哋其實係居住喺同一屋檐下。唔知佢哋有無諗過要「分居」嘅呢？
Saori：其實我同Nakajin今年都結咗婚，所以都唔係話成日出現係呢個「屋企」。不過就唔係唔住，我其實好享受呢種可以選擇幾時返嚟都得嘅奢侈，因為唔係話一定要住喺一個地方，而係中意返嚟就返嚟，想同老公一齊又可以同老公一齊～
最後問到佢哋咁好嘅目標，佢哋都好齊心答，希望下次嚟香港開演唱會嘅時候可以去更大型嘅場館，並將日本華麗嘅舞台set搬過來畀香港歌迷都感受到！
Fukase：喺香港第一次開演唱會就開喺Arena（博覽館）級數嘅地方又真係我哋FF得太犀利嘅（笑）
DJ LOVE：係囉，希望下次有機會啦。
Fukase：希望下次嚟可以開喺大啲嘅地方，就可以創造更加多嘅可能性。
Nakajin：冇錯，香港啲嘢食好好食，我都好希望可以再次返嚟～
希望經過今次嘅ONE MAN LIVE，會有更多嘅香港歌迷畀佢哋感動到，而下次佢哋就可以將日本超級靚嘅場景搬過來香港啦～～
訪問及撰文：Anne 偽現充的日常
About Post Author
