1997年5月22日，針對城岩中學三年Ｂ班學生執行嘅「戰鬥實驗第68號計劃」(電影版為「新世紀教育改革法案」)正式開始……呢個係知名小說/電影作品『大逃殺』整個故事主軸嘅開頭。提起2000年前後嘅恐怖系作品，不得不提嘅就係高見廣春嘅著作『大逃殺』。呢部原本投稿去角川參賽，卻因各種各樣原素被認為「過咗火位」而沒有得獎，最後要由曾經出版過另一本爭議書籍『完全自殺手冊』出版。
不過作品一出就備受各方注目，特別係電影推出時正值「西鐵巴士劫持事件」等少年犯罪事件被受關注嘅時期，令電影受到各界嘅質疑，甚至連劇組都要史上首次要前往國會開聽證會。不過亦因為咁樣，反而令電影更加為人注意，最終唔止國內錄得超過30億日圓票房，甚至於其他亞洲地區引起極大話題。
小說版同電影版唔同嘅地方其實都有唔少，其中最明顯嘅係電影版係「由全國4萬3千班中三學生當中，隨機抽選1班強制參加計劃」，而原著就係「由全國隨機抽選50班中三學生強制參加計劃」。
小說版嘅「戰鬥實驗第68號計劃」，亦都比電影更清楚表明真實執行原因係要「提升國民之間互相嘅不信任感」，從而將反政府勢力結成同爆發革命嘅機會減到最低。(表面原因為為陸軍提供模擬戰鬥所需數據。)，而電影版則只係提到「借BR法對青年施加恐怖支配以回復大人嘅權威。」
而計劃大約就係被抽選中嘅班級要於24小時內互相殘殺，直到只剩低1人生還為止，否則全部處死。而每人都會獲發糧食、水、地圖、指南針、手電筒以及1款防身武器，另外亦會被戴上一個可探測行蹤同竊聽，而頸環更可遙控爆炸等等。
而結果相信大家都要比小編更加熟悉，喺計劃開始一日左右，七原秋也、中川典子及川田章吾將全島最後一個生還學生桐山和雄殺死後，再騙過監視計劃嘅士兵同教官將之統統打倒。不過途中川田章吾就負傷死亡，只係得七原秋也同中川典子成功逃亡。而當日，正正係1997年嘅今日。
About Post Author
