除咗燒肉放題、鍋物放題，原來日本連拉麵都可以玩放題！位於淺草嘅「拉麵BUTA」畀¥980就可以任食30分鐘，唔好以為30分鐘好短，日本人閒閒地都可以食到兩三碗，最高紀錄係20碗，會唔會太誇張！？
「拉麵BUTA」位於淺草國際通附近，由雷門行過去大概10分鐘，地點唔太難搵。
有咩食！？
入到店內攞住格仔碟就可以開始去夾食材，呢度用餐方式半自助，鍾意咩toppings都可以隨便夾。
食拉麵一定要有嘅叉燒！不過唔好夾得太多，因為實在仲有太多好料等全大家！
左邊嘅豚角煮一定要試！雖然肉質偏肥，但入口即化嘅口感真係會令人忍唔住食多兩舊。
右邊黃色嘅係芝士絲，放一撮喺熱辣辣嘅拉麵上面可以做到半溶嘅拉絲效果。
連蔥都有2種，加多啲超好味！
雞蛋亦有3款，左邊係半熟有味糖心蛋，右上角係水煮蛋，右下角係生雞蛋。
如果你覺得30分鐘時間夠你食完碗拉麵有餘，咁食之前可以食少少沙律開吓胃。
唔使擔心食食吓口渴冇野飲，counter有橙汁同sports drink畀你自助斟。
準備開餐！
揀好想食嘅食材就可以揾個位坐低，工作人員就會過嚟同你收錢及問你想要咩軟硬度嘅麵。30分鐘會由師傅放低碗麵嘅一刻先開始計，所以揀食材嘅時候可以慢慢揀唔使急，同埋唔好一次過攞太多，因為冇限次數，想添先再攞，唔好造成浪費。
牆上面有教你唔同配搭嘅食法，想扮吓拉麵達人真係話都冇咁易！
極之似模似樣嘅「王道拉麵」！最令人驚艷嘅係湯底同拉麵麵條質素都唔差，拍得上任何一間拉麵專門店。
食完一碗如果個肚仲有大量空間的話可以再追加拉麵，但如果已經有6、7成飽就可以試埋店內其他食法。例如呢個國產雞蛋豚肉拌飯！店內有白飯提供，再揀幾種自己鍾意嘅食材撈埋一齊，又係一道簡單嘅美食！推介一定要加生雞蛋！
食到最後可以用僅餘嘅時間飲返杯橙汁，為呢一餐劃上一個非常完美嘅句號。
呢一餐真係會飽到冇朋友！
拉麺ビュッフェBUTA
地址：台東区浅草2-11-7 森口ビル1F
電話：03-5828-0055
營業時間：11:00~22:00
休息日：星期三
資料來源：gnavi
About Post Author
