香港最近終於都推出咗美食車啦～大家幫襯咗未先？ψ(｀∇´)ψ
其實日本美食車已經搞咗好多年，仲要好多地方都見到佢地嘅蹤影㖭！
今日小編就嚟到中野Central Park同兩位美食車老闆做訪問^^
200萬円足以入閘
豚丼專門店「笑い豚」嘅老闆喺6年前開始搞美食車，幾乎每日都會喺唔同嘅地方「開檔」。
問到點解唔開餐廳要搞美食車？
佢偷笑話：「要開餐廳冇幾千萬円都冇可能做到，但係如果美食車就相對平好多，真係平嘅話200萬円已經可以做到。」
美食車好好賺？
另外一間泰國菜elephant box店主就透露自己買㗎車用咗200萬円，買發電機用咗約9萬円（但係上網買便宜貨7萬就有交易），計返港紙大約花咗16、17萬。
咁其實佢地每日淨係做lunch，夠唔夠搵食㗎？
佢就計數比大家睇：「一日萬60至80碗飯，一日賺5萬円，一個月就賺到100萬円！」
不過佢強調比埋地租（每架美食車要將自己營利嘅18％交畀管理公司）、房租同其他生活開支後，一個月都係賺得10萬円，「冇咩得淨！」
愛自由愛美食車
雖然elephant box店主係咁話自己賺唔到錢，但係佢都好鍾意做美食車。
「美食車一腳踢，所有嘢都係自己一手一腳包辦，好安心。如果做餐廳就要做多好多管理之類同整嘢食冇關係嘅工作，好困身。」
佢笑笑口講：「因為鍾意自由，所以做美食車！」想返工就返，想放假就放，唔洗問人，唔洗焗住比租，好free㗎。
佢仲拎咗份剪報比小編睇：「之前大家示威抗議政府時，我仲揸埋㗎車去示威現場支援！」
美食車，又點只賺錢咁簡單。
美食車 每日款款唔同
逢星期一至星期五都有唔同嘅美食車喺中野Central Park出動。
小編揀咗星期二去試食，就有墨西哥餐、泰國菜、蛋包飯、豚丼等等七架美食車～
大家可以上佢地個官網到check吓自己嘅心水美食車係喺星期幾出現～
客人話抵讚
幫襯美食車嘅人，大多都係喺附近嘅上班族同學生，
佢地大讚美食車「即叫即整熱辣辣」、「唔洗喺餐廳同人逼」、「好開揚，身心舒暢」同「好多個人小店」，
所以天氣好嗰陣就會過嚟幫襯（^^）
大家有興趣的話，不妨都去試吓吖～～
About Post Author
