1994年今日，『機動武鬥傳G高達』(TVB譯機動武神傳)正式於日本朝日電視台首播。『G高達』並非出自曾製作宇宙世紀三部曲嘅富野由悠季監製手下，而係香港電影迷嘅今川泰宏監製，而呢套亦係第一套非富野經手嘅高達作品。所以，『G高達』入面成日聽到好有香港電影味既嘅中文，好似師傅「東方不敗」呀，絕招「石破天驚拳」等等，人家真係照拎黎同高達CROSSOVER啊……
而本作嘅出現，係由於當時高達迷開始高齡化，而原本以吸納支持SD高達嘅小學生粉絲而企劃嘅『機動戰士V高達』(吓？？？)又反應唔好，所以先想轉一轉風格攪個『機動武鬥傳G高達』出嚟。而為此仲將富野提出嘅企劃，以火星同地球嘅摩擦為背景嘅『POLKA GUNDAM』推翻，傳說呢個方案日後就衍生出另一個作品『∀高達』
作品推出初期，由「名人」川口克己開始到大部分舊粉都大力批評『G高達』，甚至有人認為係「對高達嘅侮辱」，頭3個月嘅商品銷售更加係慘不忍睹。不過隨住東方不敗等角色開始為人接受，同時又真係「吸到」小學生FANS，後來已陸續追返銷售成績，成為一套成功作品，更令高達同戰隊「睇齊」，定下「有5位主角」嘅慣例。
故事最後一集，高達、Z高達、高達F91、GP01Fb，甚至連下一套播映嘅『新機動戰記高達w』主角機飛翼高達，同珍寶3都有出現。
另外值得一提嘅係，唔少香港人以為『W高達』次序係早過『G高達』，其實『G高達』先係平成三部曲入面最早推出嗰套。各種意義上，『G高達』既創新真係令人難以遺忘……
About Post Author
