『冒險少女娜汀亞』，相信唔少有返咁上下年資嘅動漫迷應該都會好有回憶嘅作品。呢套大量參考現代科幻小說嘅開山祖師，凡爾納嘅小說『海底兩萬里』，講述被迫離開馬戲團嘅娜汀亞遇上發明家約翰，兩人踏上尋找娜迪亞故鄉之旅，之後唔單止遇到萬能潛水艇鸚鵡螺號及尼摩船長等人相遇，最後仲同尼奧亞特蘭帝國打到上太空……
名場面之一鸚鵡螺號與尼奧亞特蘭帝國原子振動砲同殲滅爆彈破壞嘅一刻
『冒險少女娜汀亞』呢套作品，無論對作品本身，對製作公司GAINAX、對播映嘅NHK，甚至冥冥中對於動畫業界整體運作模式都有各自嘅背負同深遠影響。
咁似『天空之城』嘅？
首先有冇人覺得『冒險少女娜汀亞』喺超古代文明、迷之藍石等各面嘅設定都好有『天空之城』嘅影子？ 唔講唔知，其實佢哋原本係出自同一條橋。話說『冒險少女娜汀亞』嘅原案當年本來係打算以宮崎駿來導演交到投資者手上，不過就冇被採納，於是宮崎駿就攞咗去製作出吉卜力嘅首作『天空之城』，當然最後係紅到爆炸。於是呢個原案又被掘返出嚟。
不停嘅停播
而『冒險少女娜汀亞』嘅製作同播放，其實都遇到咗唔少困難。首先係播放方面，作品雖然只有39集，但卻因各種延誤而搞到足足用咗一年先播完。延誤嘅原因真係層出不窮，由文仁親王結婚，到NHK各種特備節目，到伊拉克入侵科威特，總之就各種各樣問題總會令作品不停停播。甚至去到2004年重播時亦因為新潟地震自肅而硬生生將第31集「消失咗」。
庵野秀明又燒乾錢？ 『冒險少女娜汀亞』與GAINAX
相信睇開動畫嘅對於「GAINAX」都好有印象吧？ 呢間公司除咗出晒名多「神作」之外，比之更有名嘅應該都算係「超支」啦XD！
話說當年DAICON FILMS剛剛改名做GAINAX，岡田斗司夫唔知落咗咩降頭竟然說服到BANDAI俾八億日圓(計埋追加預算)佢玩，於是佢哋就弄咗一套『王立宇宙軍』出嚟。真心，小編覺得呢套喺當時真係一套劃時代嘅作品，事實上當時作品喺專業人士之間真係超高評價，由「電影旬報」到Livedoor前社長堀江貴文，甚至連海外傳媒都給予正面評價。
不過歷史話俾我哋知，由日本嘅ACG，到香港嘅流行文化，通常人氣同水準都係唔成正比(無謂講相反啦……)，雖然『王立宇宙軍』所有設定同技術考證都經「宅王」岡田斗司夫手處理，經得起考驗，加上故事亦算言之有物，不過由於佢實在太「文藝」，又冇女，又冇打打殺殺炸炸炸，甚至連喪屍都冇(對不起這是亂講的)，實在同市場「八字唔夾」，加上當時主流已經俾『高達』同『超時空要塞』帶住咗個風向，『王』最終只收回了不足4億票房，GAINAX就開始進入債務生活。
酒井法子主唱『飛越巔峰』主題曲「アクティブ・ハート」(個人其實比較喜歡Fly High)
之後GAINAX為了還債，於是開始咗「冇底線」嘅擺爛式經營，走商業化路線之餘連H GAME都玩埋，不過亦因此而衍生咗兩隻經典作品，分別係搵到酒井法子唱主題曲，日本科幻界最高榮譽「星雲獎」得獎作品『飛越巔峰』，同改變H GAME界嘅經典作品『電腦學園 SCENARIO』。不過『飛越巔峰』同之前嘅『王立宇宙軍』都有兩個共通點：「神作」、「超支」，皆因佢哋有個玩命追質素嘅燒錢神手庵野秀明。你以為『飛越巔峰』第6集變咗黑白真係好高意境？ 其實係冇錢咋！
即使係咁，佢哋作品出嚟嘅質素仍然吸引到希望「嚟多劑」『天空之城』嘅NHK搵佢哋拍『冒險少女娜汀亞』，雖然NHK早有戒心，但錢，還是，燒，乾，了。而且，只係，做咗，一，半。NHK於是向泡菜國尋求代包幫手，於是就造就咗第二部荒島篇嘅「神級崩壞」。最後庵野再次出於對質素嘅追求，佢自己出錢……係GAINAX自己出錢再拍最後幾集，加上電影版嘅消費同版權費去晒NHK度，於是GAINAX冇賺之餘仲要增加債務，而在『冒險少女娜汀亞』嘅輝煌歷史上亦留下了第二部同電影版兩舊屎。
冇『冒險少女娜汀亞』冇『新世紀福音戰士』
『冒險少女娜汀亞』嘅『EVA』咩事!? 真係關事架。其實現代動畫嘅運作模式，同『冒險少女娜汀亞』都有關係架。因為『新世紀福音戰士』本來就係喺前者世界觀之下諗出嚟嘅「續篇」。甚至本來NERV嘅前身機關Gehirn亦係由尼奧亞特蘭帝國嘅餘黨組成。不過由於NHK唔批版權，先令原案變成『新世紀福音戰士』咁嘅面貌。
另外，由於發展到90年代，GAINAX「天使與魔鬼嘅混合體」(出嚟嘅基本係佳作，但一定蝕到入肉)呢個形象基本已經入屋，於是有咗『新世紀福音戰士』項目後，大家開始要諗點樣令佢成事，最終當時嘅製作人大月俊倫就諗到成立「製作委員會」嘅方式運作，唔單止令『新世紀福音戰士』大熱，亦奠定咗之後日本動畫嘅運作模式。如果冇『冒險少女娜汀亞』，庵野未必有足夠名氣去賣『新世紀福音戰士』條橋，亦唔會有人去諗點樣解決GAINAX唔識用錢嘅問題，亦唔會有「製作委員會」嘅運作方式。
『冒險少女娜汀亞』對於日後動漫嘅發展，其實意外可能起咗關鍵作用。
About Post Author
