日本食玩！DIY漢堡Bell Chan！

今日又同大家搞搞震，要介紹嘅係日本食玩《DIY漢堡包餐》

 

平時上網成日見到人地整食玩個d片，已經心思思好想試下。今日就買左一盒返黎同大家開心share！

 

 

雖然全部都係日文但係唔駛驚，因為有埋圖好易明！真係唔識上網睇就可以

 

 

包裝袋千其唔好掉，因為後面你要剪出嚟做薯條袋同可樂標籤

 

 

其實佢嘅玩法非常簡單，基本上只係用水攪勻d粉再放入模度 （漢堡同包就要微波30秒左右）只需要留意返上面寫要落幾多杯水就OK！除左圖入面有嘅配件之外，你仲要自備幾樣野：鉸剪，膠紙同埋兩枝牙簽。呢d除左俾你剪個模之外仲係用嚟整一陣裝野食嘅包裝。

 

咖啡色：漢堡扒粉

橙色：麵包粉

黃色：薯條粉

藍色： 芝士粉

紅色： 茄汁粉

粉紅色： 可樂粉

 

 

攪勻嘅薯條就放落呢個模度之後拎去叮。但因為其實加好少水，所以好難攪，最後我係用手搓下佢 （記住洗手呀）

 

 

另外漢堡扒將會一開二，而麵包粉就要倒入兩格，之後各自再一開二。記住倒入去嘅時侯要整得好d，平d，唔係就會好似我咁變左成粒雞蛋仔  正常一set係可以整到兩個漢堡架，我就係個包整得太衰，變左得番一個。

 

仲有溝好芝士之後就放係呢個藍色位置（係個包裝袋度剪落嚟）壓平佢之後沿對角切就會有兩塊芝士。

 

 

仲有好重要好重要！可樂只需要倒落個杯加水就ok，但我見佢寫一杯，我以為係拎嚟量粉個個超少嘅杯仔，但其實佢應該係指個個可樂杯…不過都唔好倒太滿，因為一加水佢就會好多泡泡。下面就係我整嘅餐，er…同人地整係有一定距離嘅 

 

 

玩後感：其實呢d小遊戲都幾好玩，又唔係好貴，只係＄25，完全滿足晒煮飯仔嘅願望！當你溝個薯條嘅時侯真係會有薯條味飄出嚟，好得意！不過味道方面…真係唔好有d咩期望。整之前上網睇好多人都話佢似軟糖，但唔知點解我覺得佢口感似泥膠…可能我整得唔好  不過真係要揀，最好味應該係薯條。如果大家無聊又想過下煮飯仔癮，都可以玩下嘅！呢個DIY系列仲有好多野食，有機會再試埋俾大家睇啦！