日本咖哩飯就聽得多，湯咖哩又食過未？絕對唔係加水溝淡左個咖哩咁簡單！今日為大家介紹番札幌名物「湯咖哩スープカレー」！
喺札幌有好多賣湯咖哩嘅店，今日介紹嘅呢間湯咖哩店「路地裏カリィ侍」喺札幌擁有好高人氣，因為店內全使用北海道食材，真材實料，店主更用咗好多時間研究每一樣食材嘅煮法，務求每一啖都能令客人滿足！
半份雞半份豚角煮湯咖哩，人氣之選，啱哂兩種肉都想試既遊客！
當初點解會煮湯咖哩呢？
店主為咗想多啲人鍾意食北海道嘅蔬菜，所以搞盡腦汁，最後發現原來咖哩同蔬菜係非常咁夾，於是就開始煮湯咖哩喇！所以店嘅宗旨係「為咗食蔬菜而研發的湯咖哩」！唔係誇張，佢地嘅「一日20種野菜湯咖哩」係鎮店菜式，雖然餐單上都有其他肉類湯咖哩，但喺這間店反而變成配菜！
咁好味既秘密就係個湯底！
湯咖哩嘅湯底一啲都唔馬虎，首先加入大量北海道新鮮野菜煮足8個鐘，再加入豬骨同雞肉或者昆布同鏗魚煮12個鐘分別製作出「普通湯底」及「和風湯底」，最後再加入配方的咖哩製作成札幌名物「湯咖哩」！由於食材全天然，完全無加味精，所以就算飲哂成碗咖哩湯都唔會覺得口渴！
用北海道新鮮野菜煮嘅湯底，金黃色凝聚了蔬菜嘅甜味同精華！
仲有新鮮嘅蔬菜都係美味嘅秘密！
每一種蔬菜會用唔同嘅烹調方式去發揮出蔬菜最美味嘅味道，例如西蘭花就會將頂部燒焦一啲，紅蘿蔔會蒸煮，薯仔會先蒸再炸等等，務求令每一種蔬菜都係喺最好味嘅狀態下送到客人嘴裏！
值得一提嘅係店內使用嘅蔬菜全部都係直接向北海道農民購買，既可以實踐自給自足精神，又可以幫助農民！蔬菜係全有機無農藥之餘，每一箱蔬菜都灌注咗農民嘅愛，所以食落特別甜又爽脆！
由農家直接購入蔬菜，有品質保證！
除左名物「一日20種野菜湯咖哩」之外，普通嘅湯咖哩一般都有14種野菜，包括椰菜、茄子、蓮藕、牛蒡、南瓜等等……至於肉類，客人可以㨂雞肉（可㨂脆或唔脆）和豚角煮（即係五花腩），當然有時會有期間限定嘅款式如帶子湯咖哩、洋蔥圈湯咖哩，而且每間店都有唔同款式添！如果鍾意食某一種菜，仲可以俾錢追加！
脆皮雞湯咖哩配S的飯量，女仕都食得哂！
店內有固定餐單，但都要客人自己揀湯底同辣度，看似複雜其實好簡單！
STEP 1：㨂喜愛的湯咖哩
STEP 2：㨂湯嘅口味
有普通湯底、和風湯底、普通湯底加椰香、和風湯底加椰香可以選擇
STEP 3：㨂辣度
由0度到10度都有，0度係唔辣，10度係最辣
STEP 4：㨂飯量
無飯、SS（80g)、S（120g)、M（180g)、L(350g)、LL(500g)。
如果細食嘅人可以㨂少飯，少飯仲可以減錢！不過因為個湯咖哩撈飯係超級好味，所以唔怕食多碗飯！店內使用嘅係玄米加白米混合嘅飯，食落有啖啖榖物嘅香味！
店舖由2005年開業，由當初細細間舖頭做到北海道有6間店、東京有3間店、鎌倉有1間店，梗係有實力而且深受客人喜愛先可以屹立不倒啦！
其中一間分店嘅門口(さくら店 – 最近狸小路商店街，shopping完可以去醫肚)
店舖用不同咖哩既香料做裝飾，好有心思
如果食完想一再回味，可以買番盒即食咖哩番屋企自己煮。
去北海道或者東京既人一定要去試下！佢可能係你一生人食過最好食嘅湯咖哩！
路地裏カリィ侍
營業時間：11:30 – 15:30 、17:30 – 23:00
官網：http://samurai-curry.com/
北海道分店
-
路地裏カリィ侍．平岸店 (札幌市豊平区平岸3条3丁目2-3)
-
路地裏カリィ侍．西野店 (札幌市西区西野1条9丁目16-5)
-
路地裏カリィ侍．さくら店 (札幌市中央区南3条西6丁目1-3 ティアラ36 2F)
-
路地裏カリィ侍．北22条店 (札幌市北区北22条西4丁目2－20佐々木コーポ22 1階)
-
路地裏カリィ侍．函館店 (函館市日吉町3丁目2-1)
-
路地裏カリィ侍．北広島店 (北広島市大曲幸町3−7−6 三井アウトレットパーク１F)
東京分店
-
路地裏カリィ侍．下北沢店 (東京都世田谷区北沢3-31-14)
-
路地裏カリィ侍．神楽坂店 (東京都新宿区箪笥町27 吉田ビル１F)
-
路地裏カリィ侍. 吉祥寺店 (東京都武蔵野市吉祥寺本町2-27-2)
鎌倉分店
-
路地裏カリィ侍. 鎌倉店 (神奈川県鎌倉市小町2丁目6-26)
圖片、撰文：Ada Lau
Facebook專頁：Adalaubaby 日本人的生活。旅遊。體驗
About Post Author
