箱根溫泉旅館推介｜還記得之前小編曾經推介過10間一生人點都要住一次嘅北海道旅館？見大家咁好反應，今次繼續搵到箱根6間歎到無倫嘅溫泉旅館，最大特點是每一間旅館的客房都有私家露天風呂，連日本人都豎起手指公話正！咁無私嘅分享唔該麻煩大家順手㩒個Like～
箱根溫泉旅館1. 箱根強羅 白檀
店如其名，旅館嘅用色同建材以白壇為主，營造清新同坊香嘅空間，和洋合一嘅設計令室內環境典雅得嚟又不失設計感！房間入面都非常舒服，每間客房都設有露天風呂，私隱度滿分，幾個好姐妹浸住傾計真係一流！最特別嘅係每間客房都有唔同嘅設計，睇得出旅館為咗為客人提供舒適嘅空間花咗唔少心機！
客房集合咗和室同洋室嘅特點，空間舒適闊落，最正係有大大個對正露台同露天風呂，春天有綠林景、秋天有紅葉景，抽啲時間喺度浸吓浴，感受吓大自然嘅氣息真係好舒服！
箱根強羅 白檀
- 地址：神奈川県足柄下郡箱根町二ノ平1297番5
- 電話：0460-87-0010
- 房價：HK$6,500 起/晚
箱根溫泉旅館2. 強羅花扇 円かの杜
旅館名入面嘅「円」同日文嘅「緣」同音，原來係有特別意思！旅館主人希望可以藉住入住旅館讓客人同箱根美景結緣，成為人類與大自然中間嘅橋樑，等客人可以從內到外地感受箱根之美。一入旅館有種好古色古香嘅感覺，隨處都可以見到嘅圓形窗戶、古典土牆、水車，都為旅館增添唔少典雅嘅氣氛！
全館只有20間房間，全部都設有流水式露天風呂，懶懶地浸完浴仲可以選擇留返喺房歎住靚景咁用餐！呢度嘅料理可以整到咁好食，除咗因為有經驗大廚精心製作之外，最主要嘅原因係餐廳對食材非常講究，大部份食材都嚴選自相模灘同足柄，推介大家一定要試A5飛驒牛，一入口真係會有幸福嘅感覺！
強羅花扇 円かの杜
- 地址：神奈川県足柄下郡箱根町強羅1320-862
- 電話：0460-82-4100
- 房價：HK$6,000 起/晚
箱根溫泉旅館3. 箱根・翠松園
咩係極致高級溫泉旅館，入住「翠松園」就完全可以感受得到！呢度只有23間Suite Room，每間客房同樣都設有私人露天溫泉，無論係想靜靜地享受夜晚嘅寧靜定係欣賞晨曦一刻，呢度都係最佳嘅地方，完全冇噪音嘅滋擾，時間就好似為你而停頓一樣！
如果用心欣賞房內設計，應該唔難發現當中加入咗極具文藝氣息嘅藝術元素，唔好睇少呢啲少少嘅細節，房內沉穩嘅氣氛，藝術元素確實居功不少！
而大家都好關注嘅食物方面，除咗可以喺個室享用之外，仲可以揀坐counter位望住大廚整鐵板燒，聞到啲香味真係連口水都流埋出嚟！
箱根・翠松園
- 地址：神奈川県足柄下群箱根町小涌谷519-9
- 電話：0460-86-0852
- 房價：HK$6,500 起/晚
箱根溫泉旅館4. きたの風茶寮
身在箱根但又可以食到北海道新鮮食材嘅旅館，呢度都可以話係少數中嘅少數！除咗北海道食材，當然仲可以食到箱根當地新鮮食材，以當造嘅材料製作出美味料理，係吸引眾多在地日本人特地前往嘅其中一大原因！旅館以和式現代設計作為主要基調，迴廊仲特地以畫作作裝飾，充滿藝術氣氛！
旅館僅有10間特色客房，每間都有私人露天溫泉，風景都幾開揚，完全可以感愛到仙石原獨有嘅寂靜，浸住浴會不期然有種「終於可以鬆返一口氣」嘅放鬆感。最值得一贊嘅係喺房入面竟然搵到L’OCCITANE等大路brand product，用都用得安心啲！
之前都講過呢間旅館嘅一大特點係可以食到北海道嘅新鮮食材，所以有機會的話一定要試吓呢度嘅懷石料理，用料靚不在話下，仲要非常精緻，唔單止主食花盡心恩，就連甜點都非常用心製作，好似因應季節製作嘅花糖果，真係靚到唔捨得放入口！
きたの風茶寮
- 地址：神奈川県足柄下郡箱根町仙石原934-29
- 電話：0460-83-8526
- 房價：HK$ 2,500起/晚
箱根溫泉旅館5. 強羅花扇
來到「強羅花扇」有種回家嘅感覺，因為館內連走廊位置全部都鋪上榻榻米地板，一步入館內就可以除鞋大解放！雖然有家嘅感覺，但在於設計上仍然非常講究，例如加入「千本格子」嘅設計，令到成個空間可以立體地表現出日本傳統嘅特色！
客室方面，呢度只有和室一個選擇，室內空間頗大，純樸得嚟又帶有少少高雅嘅味道，可以營造到舒適嘅休閒氣全因小細節嘅講究，好似簡單一張木枱嘅枱面竟然用上一整塊原木製作，為室內增添咗唔少原始氣息。
每間房入面都有個可以望到綠林庭園嘅露天溫泉，由於泉水屬於俗稱美人湯嘅重曹泉泉水，有滋潤同淨白肌膚嘅效果，女士們有時間可以浸多幾次！旅館大浴場仲設有兩個可以睇到靚景嘅露天溫泉，男性專用同女性專用嘅風呂都各有特色，所以記得預留返些少時間過去浸一浸！
想有少少私人空間地進餐的話呢度嘅餐廳就啱哂，因為大部份都係個室，可以食到每天直送嘅新鮮魚介同特級飛驒牛，見到厚切嘅飛驒牛酒脂分佈得咁平均，隔住個mon個肚都開始打鼓！
強羅花扇
- 地址：神奈川県足柄下郡箱根町強羅1300-681
- 電話：0460-87-7715
- 房價：HK$5,000起/晚
箱根溫泉旅館6. 仙郷楼 別邸 奥の樹々
物以罕為貴，呢度嘅客房只有6間，真係非常矜貴！由於「仙郷楼」嘅客房比較闊落，所以4至5個人入住都一樣綽綽有餘！雖然呢間旅館只有6間房，但一樣有附睡房嘅房間、附按摩池嘅房間等等唔同房型可以選擇，每一個房型都設有露台俾住客賞月，畀住客享受難得嘅靜謐空間。
除咗房內嘅露天風呂，館內亦有大型室內風呂同與大自然融為一體嘅露天風呂，如果有時間不妨去館內嘅庭園散吓步，四圍嘅風景會隨季節而改變，非常迷人！館內亦設有手信corner畀大家入貨，又有陶藝教室畀大家體驗製作陶瓷嘅樂趣，真係足不出戶都可以有精彩嘅一日！
料理亦係預期中嘅高質素，新鮮食材喺大廚之手就輕易變出又靚又好味嘅美食，咪食咁急，唔影多兩張相真係好浪費！
仙郷楼 別邸 奥の樹々
- 地址：神奈川県足柄下郡箱根町仙石原1284
- 電話：0460-84-8521
- 房價：HK$7,500起/晚
以上文章內容轉自：Relux
About Post Author
