[日本街訪] 你唔係咁講嘢啊？一聽到就嬲嬲豬！

好多人都話日本人好溫柔，就算嗌緊交都一樣咁有禮；可愛感爆燈嘅日文同開口埋口都係一門四傑嘅廣東話簡直係有天壤之別。不過就算係幾善良嘅人都有發嬲嘅時候，日本人聽到大家講依啲說話都會嬲嬲㗎！咦，有啲好似有聽過…
 

「你就係腐爛嘅食物！」（腐った食材）

吓，讚人正菜就有聽過，話人係臭菜臭肉真係第一次聽。

話說左邊依個姐姐喺學校練習嗰陣表現得唔夠好，就比老師話佢係「腐爛咗嘅食物！」。當吓個心真係好傷…一地玻璃碎，不過佢都好好脾氣咁冇駁嘴。但係背後講吓依個老師壞話之類平衡心理嘅健康活動就當然唔少得啦～

如果有機會嘅話，佢想同依個老師講：「就算你要舉例都唔該舉個冇咁mean嘅例子吖！」（もうすこし優しい例えをして！）

嗯，佢話佢好嬲，但我都係覺得好溫柔w

 

左）「中年阿叔」（中年）

聽到嗰刻真係笑咗w比個大過自己嘅人話係中年的確會嬲嬲，但係…死啦其實我聽完都覺得好似冇講錯w

果然無論係男定係女，大家都一樣對年齡依個話題十分敏感啊～

佢想同話佢係中年嗰個前輩講：「如果我瘦咗一樣會好靚仔！」（痩せたらジュノンボーイだぜ）

嗯…應該係…

（右）「叫你做咩就做咩，真係好洗好用！」（言えばなんでもやってくれる使われやすい人）

好mean啊！！！！好mean好mean好mean啊！啫係擺到明話你係世界級嘅兵、征夷大將軍咁解啦！佢話聽到人咁講真係好唔gur，但係又好似冇講錯，所以更加之唔gur！

佢想同利用過佢嘅人講：「自己做啦你！」（自分で行ってこい！）

 

「鼻セリブ」（日本出名紙巾牌子，類似香港嘅tempo）

因為個鼻生得高，所以成日畀人叫做「鼻セリブ」，到今時今日都仲係咁畀人叫緊，第一次聽個陣真係好傷心。雖然「鼻セリブ」係好出名嘅紙巾牌子，但係其實佢都係鍾意用另外一個牌子多啲…

當初叫佢做「鼻セリブ」嘅壞蛋係一個個頭正方形嘅衰人，所以佢想大大聲同佢講，「你個方形頭，講咩嘢鼻セリブ啊！哭」（四角頭）

 

「獨仔實畀父母寵大啦」（一人っ子だから親の愛情をたくさん受けて育てたんだね！！）

坦白講比人話係獨仔獨女真係會有莫明嘅傷心。喂大佬，依啲嘢我有得揀咩？唔通我細細個2、3歲就會識得同阿爸阿媽講：「你地快啲行房啦我想要個細佬妹啊！」

依位先生比長輩講完「獨仔實畀父母寵大啦」之後真係好憤怒，我諗大家隔住個mon都feel到佢陣戾氣。

佢想同佢啲三姑六婆講：「唔好一竹篙打一船人！」（一人っ子を一つにまとめるな！）

 

右邊：「嘟～」（被cut線）

最嬲嬲唔係聽到人地同佢講咩嘢，而係講電話嗰陣對方咩都冇講就收咗線！冇錯，講byebye真係好重要㗎！

佢想同cup過佢線嘅人講：「唔該你聽完人地講嘅嘢先好收線！」（ちゃんと人の話を最後まで聞け！）

左邊：（糾纏不休嘅店員）（しつこい人）「今晚去唔去居酒屋啊～」

新宿、澀谷之類嘅東京中心地帶真係每晚都有大量糾纏不休嘅店員問人要唔要飲返杯。就算你話唔洗、唔飲、冇視佢，佢都會貼到你實一實直至你成功由條街行到去到車站入閘嗰刻。（真係有啲咁嘅人！）

佢想同依啲店員講：「我又唔鍾意你唔好癡埋嚟啊！」（好きじゃないからあまり近づかないで！！）

 

「你真係好自我中心」（自己中）

人本來就係自私嘅動物，十個人我諗有九個人都係諗咗自己先諗人地～不過直接比阿媽話自己好自我中心，真係諗一諗都覺得hurt。

依個日本妹話其實覺得阿媽係冇講錯，但係真係唔會想聽到依啲對白！所以佢想同阿媽講：「好嘈啊！煩夠未！」（うるさいなー）

 

「你都冇用嘅！」（役立たず！）

打工嗰陣比人話冇用真係喊出嚟，真心喊出嚟，但係依個姐姐就好叻冇喊到，仲好型咁黑晒面答「係啊。」

問佢有冇咩嘢想同返個前輩講，佢話愈問愈傷心、愈聽愈傷心，都係由佢發噏瘋就算啦～（聞き流す）

 

「唔好笑」（面白くない！！）

搞笑嘅時候畀人話唔好笑就係人生最傷心難過嘅時候。

不過就算比人話唔好笑佢都係會笑笑口咁話：「我會繼續努力！」（かます！！）

希望有一日有人會覺得好笑啦（因為我都覺得真係唔好笑啊）。