下個星期就係情人節喇，相信唔少人都物色緊禮物黎送比另一半，如果大家Ｒ爆頭都仲未有Idea的話，可以考慮下送酒都可能係個好選擇，你送完，隨時最後都係同你Share一齊飲。
其實日本太多好酒不能盡錄，以下為大家介紹幾款我覺得可以襯返情人節主題嘅酒，適合唔同人嘅喜好：
1. [Whisky的浪漫與刺激] 信州Ｍars Single Malt駒ヶ岳「小彼岸桜」ABV:52%
之前都有同大家講過日本威士忌大家來來去去都淨係識「響」，唔想咁「行貨」的話今次為大家介紹一個大家可能無咁熟悉嘅品牌信州Ｍars。信州 Mars 蒸溜所位於長野縣駒ヶ岳山麓，其實母公司本坊酒造係1949年已經取得威士忌蒸餾執照，而信州 Mars 蒸溜所則係1985年營運6年後因供需求問題而暫停，直至2011年先重啓生產。
呢支「小彼岸桜」係以長野縣嘅群生櫻花「小彼岸桜」為主題，以2013年蒸溜嘅原酒配合1991年停產前珍貴嘅20年以上原酒調合而成。酒精度達52%帶有少少刺激，入口有清新花香同來自雪梨桶嘅杏脯等乾果，楓糖，香氣，而且因為有高年份原酒加持，口感有層次。成件事就好似新舊記憶合而為一咁，加上包裝上嘅「小彼岸桜」都好靚好有詩意，用黎送比喜歡飲Whisky嘅另一半十分唔錯！
2. [特別的另類選擇－焼酎] 西酒造 「天使の誘惑」 芋焼酎 ABV:40%
係香港飲焼酎嘅文化並唔係好普及，但係呢一支「天使の誘惑」真係值得大家一試。
首先包裝上的Cupid符合情人節主題 (其實不是重點)。而我第一次飲呢支酒嘅時候，個感覺係好似飲緊Whisky咁，因為酒造將蒸溜好嘅芋燒酎原酒放入樫木桶同埋同樣用黎熟成Whisky嘅雪莉桶入面長期熟成達9年，帶有豐富來自芋燒酎嘅花香同來自樫木桶嘅木香，再適合雪莉酒桶嘅果香味，口感複雜而醇厚，有較長的Aftertaste，好適合加冰On Rock咁飲。呢支絕對適合送比喜歡試新野或者喜歡特別的另一半！
3. [適合喜歡甜品嘅女士 －日本酒] 越之華酒造Le Martin-Pecheurカワセミの旅- 純米原酒 ABV: 14-15%
今時今日飲酒再唔係淨係男士嘅權利，好多女士都喜歡飲酒。而呢款日本Sake雖然有個法文名，但係佢係百分百日本新瀉縣制造，日本酒度達到負三十度，味道屬多甜Level，而且呢支酒被法國知名巧克力師Jean-Paul Hevin推薦為最適合配朱古力嘅日本清酒。情人節送呢支酒再配朱古力，女士們實鍾意啦。
4. [受女士歡迎－日本酒”Champagne”] 永井酒造 日本酒Champagne「MIZUBASHO PURE」ABV:13%
好多女士都喜歡飲Champagne，因為夠Refreshing又容易入口。而近期日本流行「Sparkling Sake」，即有氣泡嘅Sake。而呢一支「MIZUBASHO PURE」嘅做法同正規Champagne嘅做法一樣，進行瓶內發酵，相比起普通Sparkling人工打汽入酒入面，氣泡較幼滑細致，係一款高級嘅Sparkling Sake，係食情人節大餐個時飲就最適合不過啦！
以上嘅酒就算你趕唔切去日本，係香港都可能搵得到，所以未買到禮物嘅朋友不妨考慮下！酒友酒魅祝大家有情人酒在一起！
Source: 網絡圖片
About Post Author
