如果你已經去過關西好多次，仲係不停Repeat難波、心齋橋、清水寺、奈良等等呢啲隨口都嗡到幾個嘅初心者必到景點，不如抽啲時間出嚟去遠少少，好似距離京都一個小時以內車程嘅「彥根」，位於滋賀縣琵琶湖東邊，有靚景有美食，最緊要係目前外地觀光客唔多，古色古香，好似返咗去舊時嘅日本咁！
如果時間唔多又諗住即日來回，可以直接去彥根嘅夢京橋一帶，參觀完國寶級古城之後可以喺老街慢慢行慢慢影相，成條城下町商店街有唔少食店同手信店，所以想下定決心唔買野，根本冇可能！
1. 彥根城
即使唔係特別喜歡歷史都建議要去彥根城睇一睇，因為城內嘅建築同靚景都足以令你拎住相機不停影影影！呢座已經有成400幾年歷史嘅古城用咗20年時間去興建，城內嘅「天守」係指定國寶，每一條木柱都刻印住歷史嘅痕跡，嚟到記得一定要上頂樓，呢度可以睇到一望無際嘅彥根全景，風景勁靚！
另一個必睇位係每日兩場嘅「彥根貓登場Show」，彥根貓係彥根城嘅吉祥物，每日嘅朝早10點半用下午1點半就會出現喺天守前面大擺Pose畀大家影足30分鐘，本身以為係小朋友先啱睇，點知彥根貓嘅Pose勁搞笑抵死，唔覺唔覺會睇足全場！
天守入面嘅樓梯又高又直，安全起見大家唔好怕醜怪，可以手腳並用上落樓梯。
未夠鐘已經有唔少人坐咗喺度等，現場氣氛好好，彥根貓每做一個動作大家都笑得勁大聲！
呢個玄宮園亦係城內必遊之點，由江戶時代嘅大名斤建，好天嘅時候湖水簡直就係一塊鏡，反映湖邊嘅建築同一花一草，個景靚到有當地人特登走去寫生！
彥根城
地址：滋賀県彦根市元町4番2号
電話：0749-30-6143
營業時間：08:30～17:00
入場費：彥根城及玄宮園 大人 ¥600、小童 ¥200
2. 政所園
十個有八個會走入呢間店嘅人應該都係被廚窗精美嘅擺設所吸引，入到去仲驚喜，除咗出面都見到嘅陶瓷碗碟之外，店內仲有好多其他可愛瓷器小擺設，買嚟做小手信送畀姐妹們最適合不過！唔單止有野買，由於呢度係可以飲杯野休息吓嘅「茶処」，當然仲有多款同抹茶有關嘅甜品同飲品，行到攰攰地，可以喺度休息返陣抖一抖。
唔好以為舖頭唔係好大好快就行完，樣樣Product都咁靚，慢慢研究一番時間就係咁唔經唔覺咁流逝！
行咗冇耐店員突然遞咗杯茶過嚟，冬天有杯熱茶飲吓真係暖到入心！同埋想講呢個係一個好好嘅軟性推銷，試完杯茶有唔少人都走去counter問呢個係咩茶，店入面有冇得買。
連個茶壺都靚過人，可能沖茶真係會好飲啲！（笑）
呢隻招財貓個樣明明好似好普通，但又係會成功令人忍唔住停低望多兩望！貓仔有舉左手同舉右手之分，左手招丁右手招財，唔好買錯～
話明係「茶処」，又點可能冇同茶有關嘅產品發售！
呢度嘅Choice Tea包裝得好靚，¥100一包勁抵玩，買嚟做小手信都幾好睇。
呢兩包「政之香」就係之前店員畀我地試飲嘅茶啦，「甘味一撰」嘅茶味飲落會比較香醇甘甜，而「香味一撰」就比較著重香味，聞落比飲落更香。
行完一輪最後緊係要坐底慢慢食返個甜品或者飲杯茶啦！如果天氣唔係太凍，不妨坐去室外位置，室外有個小小嘅庭園，環境好舒服，係一個好好嘅影相位！
喺一個咁舒服嘅空間歎茶真係勁寫意！
政所園 夢京橋店
地址：滋賀県彦根市本町2-1-7-1
電話：0749-22-8808
營業時間：09:30～18:00
休息日：不定休
3. きむら
不足10cm長嘅小型鮎魚係琵琶湖特有嘅品種，既然嚟到位於琵琶湖東邊嘅彥根，當然要試吓小鮎魚製品！呢間KIMURA就係可以買到唔同小鮎魚加工品嘅專門店，最正就係部份產品有得試食，齋睇樣好多款個樣都差唔多，但試落味道非常唔同，所以買之前記得試吓味，買多幾包返香港可以隨時加餸！
店內以小鮎魚嘅加工品為主，單係呢種小鮎魚店方已經有多種唔同炮製方法同食法，真係大開眼界！
細細盒嘅包裝帶多兩盒返去都唔覺好浪費行李空間，又多個藉口掃貨啦～
呢個「小鮎魚煮」算係呢度嘅主打，唔試由自可，一試真係不得了，鍾意食魚的話一定會愛上，用嚟送飯真係咩餸都唔需要！
就係呢隻啦，有大盒同細盒之分，如果一家人都鍾意食就一定要買大盒，否則小編敢寫包單你一定唔夠食！
呢個「鮒寿司」小編都覺得好值得一試，唔係因為好味，而係因為佢係滋賀縣嘅鄉土料理，喺日本唔係任何地方都可以食到。不過留意返，雖然佢叫壽司，但其實係醃製食品，用鯽魚、米飯、鹽醃足十幾個月，味道一啲都唔似平時食開嘅壽司，咸味較重，仲會有少少芝士味（講真真係幾重口味，連日本人都唔係人人接受得到！），比較適合用嚟送酒。
除咗加工食品，店內亦設食堂提供新鮮鮎魚料理，有鹽燒有天婦羅任君選擇，味道好傳統。
あゆの店 きむら 彦根京橋店い
地址：滋賀県彦根市本町二丁目1-5
電話：0749-24-1157
營業時間：09:30～17:30 （Lunch Hour 11:00～14:30）
休息日：星期二
4. 山上
呢間「山上」係漬物專門店，入面有幾十款唔同嘅蔬菜漬物，當中有唔少都係坊間比較少見，而大部份嘅漬物都有得試食，試過之後你就會知道原來漬物都唔一定係重口味，清清地感覺更健康。大家買還買，自用的話唔好買太多，因為呢間舖頭嘅漬物冇乜添加防腐齋，好容易過期。
門口呢個哥哥好搞笑，由於當日採訪關係需要喺條街不停走嚟走去，個哥哥每見親我地就話「你地又返嚟啦？」，仲不停叫我地試食，咁好service，試問有邊個會忍心食完就離開，唔入去行吓！
店內大部份漬物都可以試食，有啲咩疑問不妨問問店員，佢地個個都勁nice，絕對唔會硬銷，見到你試食試得好滿足佢地已經勁開心，勁攞唔同野畀你試到夠本。
呢個日野菜係近江特產，好爽口，醃製過之後有少少wasabi味，但味道仍然好清，係嚟呢度嘅必買之品！
呢幾條就係日野菜嘅真身，喺香港好似未見過，大家又有冇見過呢？
「琵琶滿月」個名超好聽，其實佢係用咗琵琶湖產嘅大頭菜整嘅漬物，加咗有柚子味嘅甜醋醃製，入口微酸同帶有輕微嘅柚子香，好開胃！
未入店門店員哥哥已經不斷可我地試呢個芝士，據佢所講呢個芝士加咗味噌去整，切成細細粒用嚟送酒一流！漬物店竟然有芝士賣，真係估佢唔到！
山上金亀城町店
地址：滋賀県彦根市本町2丁目1番5
電話：0749-26-0205
營業時間：10:00～17:00
休息日：不定休
5. からんころん
「KARANKOLON」係一間和式雜貨店，有大量和式可愛小物，女士們未踏入門口應該已經會被店外平價雜貨吸引到想9秒9即衝入去！除咗大量和式飾物同擺設，當中好值得買嚟做紀念品嘅係彥根吉祥物彥根貓「ひこにゃ」嘅Product，個樣白??肥嘟嘟勁得意可愛！
門口呢埋袋仔全部¥1,080三個，勁抵，靚到就算¥1,080一個我都會考慮買！
唔單止有飾物，店內仲有銀包、電話殼等等加入咗濃厚日本元素嘅精品，嚟到呢度好容易會患上選擇困難症。
店主話呢個用古布整成嘅和尚公仔係人氣No.1嘅Product，望住佢咁祥和嘅樣心情都靚啲。
呢隻就係彥根嘅吉祥物彥根貓「ひこにゃ」啦，肥肥白白係咪好可愛呢！
からんころん
地址：滋賀県彦根市本町1-1-31
電話：0749-27-2455
營業時間：10:00〜17:30
休息日：星期四
6. おおすが
如果想買盒和菓子返去做手信，呢間「OOSUGA」一定係不二之選！咪睇入面裝修好似好高級，賣嘅野就一定貴，禮盒裝¥1,000左右有交易，買嚟做手信最適合不過。
啲包裝包到實一實唔知入面咩樣？唔使怕，店內大部份菓子都有sample畀你睇，仲有詳細文字解釋，不過就冇得試食，如果真係想試吓的話可以買單件散裝。
呢個「三十五万石」係店內名物、彥根極具代表性嘅名菓，中間包住北海道產嘅紅豆餡同一小塊軟綿綿嘅年糕，連當地人都好鍾意買嚟做小禮物送畀人。
嚟到彥根又點少得彥根吉祥物彥根貓「ひこにゃ」嘅人形燒！如果想即場食的話可以散買，一個¥130，口感比坊間嘅人形燒更煙韌。
菓心 おおすが 夢京橋店
地址：滋賀県彦根市本町2丁目2-47
電話：0749-24-1128
營業時間：09:00〜18:00
休息日：星期三
7. 焼牛 たかし
彥根夢京橋有好多美食，雞肉親子丼飯、海鮮飯、鰻魚飯等等都可以喺呢度搵到，不過嚟到位於滋賀縣嘅彥根，當然要試吓同松阪牛及神戶牛並稱為日本三大和牛嘅近江牛啦！喺呢條街有唔少食店都可以食到近江牛料理，價錢有平有貴，如果大家想食燒肉，不妨嚟呢間「TAKASHI」，入面座位唔多，勁有家庭Feel，自己燒又得，請店主燒完再上枱都得。
店內只有counter位同榻榻米座位，如果想自己燒就一定要坐榻榻米座位，counter位冇設燒烤爐。
店入面有咩食，全部掛哂喺牆上面，不過只得日文Menu，如果唔識日文或唔知點揀好，可以直接點選「おまかせセット（¥2,100/人）」，食材由店主發板，比起單點，呢種食法可以試多幾款唔同食材。
牛肉一到即刻急不及待放哂上燒烤爐，如果對自己技術冇信心，可以請店主燒好先上菜。
呢一碟係牛嘅背脊肉「近江牛のロース肉」，油脂分佈超平均，輕輕燒一燒就可以食，入口牛味香到講唔到野，點多碗白飯包係食到停唔到口！
睇見啲油光就知道塊肉有幾肥美，一定要叫碗白飯，信我！
呢一碟比牛脊肉肥少少嘅係肚腩位置「近江牛特選ハラ身」，油脂更多香味更濃，就咁食可能會覺得有啲膩，所以都係嗰句，一定要叫碗白飯，信我！
燒完出嚟好明顯比牛脊肉肥啲，但偏偏有唔少人鍾愛呢種油膩感，特別係近江牛呢種上等牛肉。
如果食完仲覺得唔夠飽，可以叫碟即點即炒熱辣辣嘅日式炒麵，有雞肉同大量蔬菜，惹味到連碟底嘅醬汁都想舔乾舔淨！
焼牛 たかし
地址：滋賀県彦根市本町2-3-3
電話：0749-23-3644
營業時間：17:00～22:30
休息日：星期一
About Post Author
