大家有冇食過日本麥當勞嘅白汁可樂餅漢堡「グラコロ」？呢個漢堡原來已經推出咗成23年，係每年冬天都會出現嘅期間限定款式，年年都熱賣，今年竟然話會搞搞新意思，upgrade吓個包喎！
呢個漢堡最大特色就係中間夾住件超厚身嘅爆醬可樂餅，一咬開舊可樂餅，入面嘅白汁、大蝦同通粉就會湧出嚟，冬天凍冰冰食返件都咪話唔爽！
而今次嘅革新，麥記就選擇喺醬汁同個包落手，有蛋黃味極為香濃嘅雞蛋醬汁同有少少辣、越食越惹味嘅辣汁兩種可以揀，各有睇落都好似好好味，好想兩種都試哂佢添！至於個包，今次就落重咗cream同牛油去整，所以一食就會食得出個包比以前更香同更軟綿。
如果大家想試更濃郁嘅味道，可以叫呢個加咗塊芝士嘅「超デミチーズグラコロ」，芝士同可樂餅嘅味道本身就好夾，一大啖咬落去，所有味道好似渾然天成咁完全無違和感，難怪23年嚟都係大受歡迎之作！
超グラコロ
發售地點：日本全線麥當勞
發售日期：12月14日～
售價：¥340
超デミチーズグラコロ
發售地點：日本全線麥當勞
發售日期：12月14日～
售價：¥370
About Post Author
