『死亡筆記』背後嘅男人？ 黃金拍檔 小畑健×大場鶇

隨住上年播出嘅日劇同就快喺香港上畫嘅電影《死亡筆記：照亮新世紀》，『死亡筆記』再次成為城市熱話。提到『死亡筆記』，除咗會諗起「新世界嘅神」夜神月同「家裡蹲天才」L之外，當然就係創作呢套震撼當年日本動漫界嘅黃金組合——小畑健、大場鶇吧！ 今次就為大家簡介一下佢吔嘅背景！

 

畫工細膩嘅天才畫師——小畑健
出生於新潟縣嘅小畑健係學生時代就以作品『500光年的神話』獲得手塚賞嘅提名。其後經歷數年嘅助手生涯後，以筆名「土方茂」於「少年JUMP」上連載首套作品『超能機動爺爺G』。其後於『魔神冒險譚』時改用依家嘅筆名，其後1998年開始連載嘅『棋魂』，不單掀起了一片圍棋熱潮，更令他本人聲名大噪！

 

 

而到咗2003年，與原作者大場鶇嘅相遇，令他進入了另一個高峰。佢吔首套合作嘅作品，就係依家眾所周知嘅『死亡筆記』。憑著小畑出色嘅畫功，配合大場環環緊扣嘅鬥智橋段，令漫畫風頭一時無兩，不單為集英社帶來可觀收入，更成為當時嘅「社會現象」。其後小說、電影、電視劇集改篇接踵推出，影響一直維持到而家。

 

 

喺『死亡筆記』完結後，兩人沉寂了一段時期。直到2008年，兩人再次回歸。今次嘅題材竟然係……漫畫家！ 描寫目標要喺少年JUMP上連載漫畫嘅兩人組合實現夢想歷程嘅『爆漫。』，雖然唔係大場最擅長嘅鬥智鬥謀類作品，但憑著兩人本身於漫畫行業嘅經歷，最終『爆漫。』亦成為了一套非常出色嘅作品，當中身為漫畫家及原作者嘅兩名主角，更或多或少有著佢吔兩個人嘅投影。其後『爆漫。』亦被動畫化及真人電影改編。
 

 

兩次合作過後，兩人已經被公認為漫畫界嘅黃金拍擋。到了2015年，他們第三次合作，推出以死亡與重生為主題嘅作品『Platinum End～明日的天使～』，直到而家仍然連載當中。

 

 

除咗同大場合作嘅作品外，近年嘅漫畫作品仲包括曾改編成電影，原創小說『All You Need Is Kill』嘅漫畫版、西尾維新原作嘅『RKD-EK9』、櫌伸晃原作嘅『學糾法廷』等。此外，佢亦曾經為小銳等書籍繪畫插圖，亦曾為『義經紀』、『惡魔城 審判』等遊戲擔任角色設計。
 

小畑健嘅最大特色，莫過於佢細膩過人嘅畫功，線條非常紥實，而且很擅身運用由漫畫本身黑白構成嘅陰影效果，造出迫力十足嘅氣氛，『死亡筆記』可以俾人喘不過氣嘅效果，好大部分都係歸功於佢呢種手法。而喺畫功出色嘅另一面，敍事方面嘅功力卻顯得平凡，因此佢初期好多作品都爛尾收場，就連有堀田由美協助嘅『棋魂』亦避唔開咁嘅結局。而擔任劇情方面工作嘅大場，就剛好彌補到佢呢方面嘅不足。
 

大場鶇真身之謎

相對小畑由低做起慢慢成為大師，大場本身卻係「平地一聲雷」，一上場就與當時已畫了『棋魂』等名作嘅小畑合作，炮製『死亡筆記』。另外佢亦曾與另一名漫畫家るびこ合作，於「週刊YOUNG JUMP」上連刊了短篇『SKIP！山田君』。

 

不過，其實從日本嘅漫畫業界，甚至於日本職場嘅慣例，好似大場鶇咁「一步登天」其實真係比較少見。加上集英社一直都避談大場鶇嘅真實身分，連Jump編輯部內部都好少人知佢係邊個，於是就有咗「真實身分其實係相當老手嘅大作家」嘅講法。

 

不過，大場確實係彌補咗小畑劇情薄弱嘅問題，令佢能夠集中精力於作品之中。大場嘅舖排如何出色，相信看過『死亡筆記』爾虞我詐嘅精彩劇情都大概明白（雖然最後收尾都係失咗手…）。而喺『爆漫。』嘅間場漫畫中，則可睇到佢如何構思草稿分鏡，等小畑按照佢嘅構思畫出漂亮嘅畫稿。

 

相信睇到嗰D草稿大家一定有個疑問：點解啲公仔好似咁眼熟，有少少似『行運超人』作者蒲生洋畫嘅？
 

 

大場鶇係蒲生洋!?

雖然大場本人冇現身過，但有幾個似乎好有力嘅「證據」，引證咗「大場鶇就係蒲生洋」嘅說法？
1、剛才提及於『爆漫。』中嘅草稿，以及『JoJo的奇妙冒險』25週年紀代中，大場所畫嘅東方仗助，畫風均與蒲生本人相似。
2、『爆漫。』中主角真誠最高嘅叔叔真誠信弘係個煙鏟、畫技水皮、以搞笑英雄漫畫為代表作。呢幾點同以『行運超人』成名嘅蒲生好接近。
3、於2005年第4回日本御宅大獎中，岡田斗司夫說出了「大場鶇就係蒲生洋啊」。其後佢係雜誌補充，呢件事係從連載雜誌編輯身上聽返嚟，透過複雜關係而知道呢件事。另一方面出席同一活動嘅鶴岡法齋亦於同雜誌中提出咗『行運超人』嘅畫風與大場本人嘅共通點，似乎更加肯定咗「大場鶇就係蒲生洋」嘅講法。
 

當然，無得到本人承認，我地無法證實大場就係蒲生，只能係客觀證供自行判斷。係唔係就留番俾讀者自己諗諗啦。

 

 

小畑健、大場鶇首次「雙劍合壁」嘅作品『死亡筆記』，唔單止由漫畫被改篇成動畫，拍埋電影、電視劇、舞台劇，遲啲仲登陸荷里活添。而距離首套電影版推出嘅十年後，全新續作再次登上銀幕，而1年前日本亦推出了劇集版嘅『死亡筆記』。到底呢幾個以真人演出嘅版本中，男女主角又有甚麼嘅差別呢？