[放工新宿鬆一鬆]地道日本人必去 思出橫丁居酒屋

（第一次見到個陣，唔知點解覺得好有台灣夜市feel哈哈）

 

「思い出」係日文嘅回憶咁解。咩回憶？想當年戰火遼原，戰後嘅新宿只係淨低一埋頹垣敗瓦……當時糧食不足嘅問題好嚴重，想入口用嚟整拉麵啊、烏冬等等嘅麵粉非常困難，唯一冇入口管制嘅，就係冇人想食嘅動物內臟。於是各式各樣做內臟煮、內臟串燒嘅餐廳就陸陸續續出現，嚟到今日，大家咬住舊雞腎個陣都會諗起好多好多以前嘅回憶……就係咁，依條街個名就變咗做「思い出橫丁」啦～

 

成條街有好多居酒屋，有啲仲會有中文menu㖭！不過九成九食客都係日本人，可能因為啲遊客見到地道得滯唔敢坐落嚟？

any肥，我發現咗一間勁勁勁多人排隊嘅居酒屋「もつ焼き　ウッチャン」，主打食燒內臟嘅（有中英menu），咁就緊係快啲狗衝去試吓啦～

 

入到去，omg好有風味！全部都係得bar檯位，仲要係勁勁勁逼，同隔離嗰位好貼吓㗎！

 

可能因為咁，大家都好隨意地同隔離位搭訕，講吓工作啊生活啊咁～～真係好好氣氛～

（講明，係佢地主動向我搭訕，唔係我主動撩日本仔㗎）

 

話明居酒屋緊係唔少得酒～依間店嘅其中一個賣點就係，好濃！啲酒好濃！唔係和民嗰啲淡到死果汁！

 

介紹返啲當店名物先～依碟係炒內臟～最欣賞個醬，甜甜地，nice～本身以為食內臟唔會飽，但其實啲皮同腸都幾滯……

 

跟住依個就係檸檬胡椒炒麵～同一般炒麵嘅麵質唔同，依個麵比較似腍同幼身嘅意粉～鍾意胡椒嘅朋友會好啱你胃口～女士們就要小心啲胡椒攝牙罅啦～

 

串燒基本都係即叫即燒，好新鮮㗎！

 

由於佢種類太多，咩直腸啊、動脈啊、橫膈膜啊咩都有，真係唔識揀，就叫咗一個廚師精選五串set。紅色個pat係紅薑醬，開胃就開胃嘅，但好唔好食就見仁見智啦～串燒燒得唔錯，唔會un又唔會太濃，啱啱好～最好食係腸～外脆內軟～加埋本身個燒汁真係冇得彈～

 

如果想感受地道嘅日本文化，新宿依條「思い出橫丁」真係不失為一個好選擇～一入到鋪頭，店員同客人、客人同客人嗰種相知相惜嘅感覺，真係好溫暖，好難得。喺香港，依種感覺唔知算唔算係奢侈品呢？