【半夜三更去邊好？】「磯丸」有得食24小時壽司放題！

大家有冇聽過「磯丸水產」？係咪覺得好似好熟口熟面呢？磯丸水產係一個以海鮮料理為主嘅連鎖居酒屋，目前喺全日本已經有成100間分店，所以曾經喺日本見過一啲都唔出奇，啲野食都幾好味㗎，未試過的話都可以一試。

 

 

不過今次想介紹嘅並唔係呢間居酒屋，而係集團旗下新開嘅姊妹店「磯丸壽司」。呢間壽司店喺上年11月先開，主打海鮮壽司，同磯丸水產一樣都係24小時營業，仲有得食放題，係一眾深夜餓狼半夜三更嘅好去處！如果大家到日本之後或者離開日本之前都咁啱係凌晨，不妨過嚟食返餐超豐盛壽司放題先~

 

 

放題有兩種價錢選擇，平啲嗰種可以食到80道料理，貴啲嗰種可以食到100場種料理，當中包括中拖羅、海鰻、海膽等等高級食材，全部都好新鮮，以呢個價錢半夜三更都可以食到咁高質嘅壽司，都幾驚喜！

 

店內係一貫磯丸風格，裝修到成個漁港市場食堂咁，食都食得有feel啲！

 

Menu都幾豐富，壽司仲可以一件一件咁叫，想食幾多叫幾多，啱哂想試多幾件唔同款式嘅人。

 

最後溫馨提示，磯丸壽司喺11月23日至30日嘅朝早11點到夜晚10點會有¥500折扣優惠，而磯丸水產一路大獲好評嘅「半價猜拳大會」喺磯丸壽司店內都有得玩，勝出者可以得到最高¥10,000嘅折扣優惠，搞到現場氣氛勁high，好好玩！

 

地址：神奈川県横浜市西区南幸2-14-3 海東ビルB1・1F

電話：050-5784-2563

價錢：「ゆかり放題」 女士 ¥2,480、 男士 ¥3,480；

           「きづな放題」 女士 ¥3,480、 男士 ¥3,980

營業時間：24小時

休息：無