最近好多舖頭都有推出超量級料理，連香港都唔例外，啲料堆到成座山仔咁高就算唔太好食都可以影張想呃吓like。
眼見大大份嘅料理而家咁受歡迎，有日媒就忽發奇想，去一啲連香港人都好熟悉嘅餐廳度叫店員幫佢整份「特盛」料理，視覺效果遠超市面有嘅超量級料理，我諗如果我咁啱坐喺佢地附近，應該會忍唔住過去影返兩張相~
1. 32塊吉列豬扒咖喱飯＠CoCo壱番屋
叫咁大份量，為咗唔好阻礙到間舖頭嘅運作，佢地通常都會打個電話去問問可唔可行先，今次佢地一打去問，話想要一份等同一萬円份量嘅吉列咖喱豬扒飯，對方話冇可能，就係佢地好失望之際，店員就話係今日唔得，因為冇咁多存貨，如果係聽日打後就冇問題！心情即刻由谷底飛返上天堂。
一上枱真係嚇一跳！數一數啲豬扒有成32塊，如果一日三餐都食豬扒，都要最少10日先消滅得哂佢地！
個飯有幾大客？拎埋上手畀你睇！
真係辛苦哂落單嗰位，數都數到眼花。有32塊炸豬扒嘅吉列豬扒飯盛惠¥9743。
一個人食唔哂嘅豬扒佢有拎返公司同大家一齊分享，同事們話雖然凍咗但都仲係好脆好好味，瞬間就清哂啦！
＝＝＝＝＝＝＝＝＝＝＝＝＝＝＝＝＝
2. 45隻炸蝦天婦羅丼飯＠てんや
講到天婦羅丼飯，日本人通常都會諗到「てんや」呢間食天婦羅丼飯嘅專門店，所以佢地都揀咗呢間店去挑戰¥10000嘅炸蝦天婦羅飯到底會有幾多隻炸蝦。因為店員話幫唔到佢地將所有蝦砌哂上個飯度，所以幫佢地另上，由佢地自己將所有蝦放返上個飯度。
45隻蝦總共用咗5個碟先裝得哂！
砌哂上去之後碗飯超壯觀！同埋不得不讚吓佢地嘅層層疊嘅工夫，唔知佢地試咗幾多次先可以成功地將所有蝦放哂上去呢？
做佢同事都幾好，久唔久就有好野食，返返吓工都有天婦羅蝦食係咪爽先！
＝＝＝＝＝＝＝＝＝＝＝＝＝＝＝＝＝
3. 1000塊芝士漢堡包＠Burger King
佢地今次3日前就打去請Burger King整個要有1000塊芝士嘅漢堡包，店方一啲都冇托手㬹，好爽快咁就應承咗。當佢地入到店入面，就已經見到個超巨型漢堡包喺度等緊佢地啦。拎上手個包勁重，秤一秤有成差唔多13公斤重，仲重過一個一歲小朋友啊！
拎返去嘅路途都幾辛苦，又重又要就住就住唔可以畀佢倒塌。
當正當包同特大包放埋一齊，就會睇到個特大包真係好大！
最令人期待嘅一刻到啦！嘩！呢個根本就唔係一個漢堡包！
為咗唔浪費食物，佢地都好力咁清咗佢包去，但要咁樣食芝士法，真係睇到都覺得好漏。不過根據佢地嘅講法，呢個包比想像中冇咁漏，大啖大啖食都幾好味，最後食咗350塊左右就投降啦。
最後佢地都不忘揭開個底睇吓下面塊包同幾乎已經被遺忘嘅漢堡扒，塊包一早已經畀啲芝士夾篇哂
Burger King嘅特製芝士咁好味，當場食唔哂嘅芝士大家都唔搶住拎哂返屋企用嚟整其他料理嚕～
＝＝＝＝＝＝＝＝＝＝＝＝＝＝＝＝＝
4. 718塊青瓜漢堡包＠Burger King
玩過返尋味，繼上面嘅1000塊芝士之後，佢地今次就挑戰到底¥10000嘅漢堡包會係點嘅。佢地今次將個重點放嘅醃青瓜身上，扣除漢堡包價錢之後，就將剩返嘅¥9190全部用嚟追加醃青瓜，店員聽到呢個order都話ok嘅，不過就唔擔保個包好唔好食，結果個包入面係夾住718塊青瓜，點食！
紙袋返到去個底已經濕哂，開嗰時要勁小心，萬一塌咗落嚟真係功虧一簣。
開！嘩好得人驚啊！超多青瓜！不過店員都幾勁喎！真係可以砌到唔塌落嚟！
要點樣食佢地完全無從入手。
咁多青瓜一個人當然食唔哂，結果咪所有同事有福同享囉，大家都食得幾開心吖～
＝＝＝＝＝＝＝＝＝＝＝＝＝＝＝＝＝
5. 1050塊煙肉漢堡包＠Burger King
今次佢地都係揀咗Burger King，因為當時做緊promo，所以¥100就可以追加到15塊煙肉，結果¥10000嘅煙肉份量係比¥10000嘅青瓜多好多！由於冇事先打去舖頭，所以點餐之後都要等成2個鐘，份大作先出現，因為店方話單單係解凍煙肉都需要花唔少時間，仲要逐塊煎，2個鐘煎成千塊，算快啦！
個嘅賣相真係有啲恐怖，成千塊煙肉夾埋一齊原來係咁嘅樣嘅！
喺側面睇完全睇唔出係一個漢堡包！呢度應該已經係我一生嘅煙肉份量……
雖然睇見都覺得好漏，不過佢地就話其實超級好味，仲鼓勵大家試吓挑戰呢道料理喎。
咁多煙肉一個人當然食唔哂，結果啲同事都好好人地一齊開心share，一邊做野一邊清貨。
以上嘅實驗得出嘅結論係，日本人嘅脾氣真係好好，如果換轉係香港，又會有幾多間肯陪佢地癲呢？
圖片及資料來源：rocketnews24.com
About Post Author
