大阪延羽之湯 鶴橋店｜好多人去大阪都會去心齋橋行街，又或者去環球影城玩返日，咁如果想嘆返一日呢？今次就想介紹大家呢間會一去再去，超正嘅溫泉館－【天然溫泉 延羽之湯 鶴橋】！點解話會一去再去，又可以嘆到成日呢？事關呢度唔只有溫泉浸，仲有藥石汗蒸房可以焗汗，價錢亦十分經濟，一個價錢就可以嘆成日！係個十分正嘅地方，所以決定寫呢篇blog分享下！
日本溫泉樂園：Spadium Japon東京溫泉樂園｜名古屋溫泉 天空SPA HILLS
大阪天然溫泉 「延羽之湯 鶴橋」
呢間【天然溫泉 延羽之湯 鶴橋】有藥石汗蒸房、室內及露天溫泉，仲有私人貸切風呂，一幢4層，真係可以喺入面嘆成日㗎～
好，開始介紹啦！一入到去擺好咗鞋就可以登記啦，首先睇下自己想做啲咩或揀咩package，揀好咗之後職員就會俾一個電子鎖鑰圈你，其後喺入面嘅消費，都係用呢個電子鎖鑰圈嘟一下，就可以最後一次過計返錢㗎啦。
首先講下藥石汗蒸房，如圖所見分咗左右兩面，左邊係汗蒸房，右邊係藥石房。汗蒸房入面間隔開揚，分咗藥石火焰爐區同岩塩房。岩塩房係可以成個人捐入去個洞度焗汗(好攪笑)，屬於更高溫嘅區域。
藥石汗蒸房使用貴重藥材及低溫至高溫熱，有美容、健康及回復疲勞之效。好多人都試過韓國嘅汗蒸幕，呢個同樣原理嘅汗蒸房，加咗藥材，俾客人有一個休息又可以美容嘅時間。入到去就會俾一套衫你換，就係以下呢套啦。
而藥石房就有分幾間細房，入面有各種藥材包，所以會有好大浸中藥味，每間房大約可以瞓8－10人左右。兩邊區域都係男女共用，入到去記得唔好發出太大噪音騷擾到其他人哦。
休息室
汗蒸完大家就可以出嚟休息區，有雜誌漫畫等等俾客人慢慢休息。
露天風呂
露天風呂分男女部，有4個唔同嘅池，入面仲有桑拿可以焗！
室內風呂
室內風呂有分內湯同座湯，同一般溫泉無差。
私人風呂(華離宮) 重點！！！
呢個十級推薦嘅私人風呂，好適合一家人或者一對couple嚟！因為日本通常係大眾浴場，都係男女分開嘅，呢個地方就可以俾家庭或情侶使用啦。喺4樓一共有11個私人風呂，登記時同職員講咗大概想幾點浸，時間差唔多嘅時候就可以上去，如果唔記得咗，佢仲會去搵你提返你?，好細心㗎。入到去貸切風呂，有齊梳洗用品，環境十分舒適，限時一小時。呢個係額外收費嘅，如果想用耐啲都可以同返職員講～
私人風呂就有三個房型，咁就可以揀返個自己鍾意嘅房型。房同溫泉隔咗一度玻璃門，溫泉係露天嘅，仲有沖涼嘅corner，真係十分舒適㗎～
(一)
(二)
(三)
我自己勁鍾意呢個溫泉館，因為入面應有盡有，價錢又唔貴，我自己已經去過3次啦！呢度職員服務亦十分好，設備乾淨整齊，鍾意嘆嘅人可以直程喺入面嘆返日都得！默默地好想香港都有一個咁嘅地方，一定會成日去～～如果大家下次去大阪記得去呢個咁正嘅地方啦！
＝＝＝＝＝＝＝＝＝＝＝＝＝＝＝＝＝＝＝＝
延羽之湯 鶴橋店收費
温泉・露天風呂・桑拿(不限時)：
| 平日 | 週未及假期 | |
| 大人（中学生以上） | ¥900 | ¥1,000 |
| 小人（小学生以下） | ¥500 | ¥560 |
藥石汗蒸房(不限時)：
| 平日 | 週未及假期 | |
| 大人（中学生以上） | ¥1,080 | ¥1,180 |
| 小人（小学生以下） | ¥680 | ¥750 |
私人風呂(華離宮)：
1房（1小時）：3,900円
＝＝＝＝＝＝＝＝＝＝＝＝＝＝＝＝＝＝＝＝
延羽の湯 鶴橋店
- 地址：大阪市東成区玉津3－13－41 (鶴橋駅步行約10分鐘)
- 電話：06-4259-1126
- 營業時間：9am ~ 2am（最終受付 深夜1時）薬石汗蒸房最終受付深夜24時
網址：http://www.nobuta123.co.jp/nobehatsuruhashi/
About Post Author
