中秋節快樂啊！今日喺香港就係公眾假期，喺日本其實都有中秋節，但就唔係假期喇！
農曆8月15日月圓，喺日本係叫「十五夜」~
到底日本嘅中秋同香港嘅中秋有咩分別呢？
1）香港人食月餅、日本人食賞月糰子（月見団子）
呢個應該就係最大嘅分別！每年中秋唔能夠少嘅月餅，但日本傳統就係食用米飯搓成嘅月見糰子。佢哋會喺可以賞月嘅地方放象徵滿月嘅糰子同埋可以除魔嘅芒草、再加上秋天嘅農作物祭品（例如呢個時期嘅芋頭）拜神、祈求豐收，順便飲酒賞月。其實賞月糰子係飯後甜品嚟嘅，日本人會擺放一年見到嘅滿月數量，亦有人會因為十五夜所以擺十五個～
2）中華玉兔整長生不老藥、日本玉兔整麻糬
相信有聽過神話故事嘅都知道月亮住咗隻玉兔。喺中國神話入面、玉兔嘅作用就係喺廣寒宮都攪拌長生不老之藥，但喺日本文化入面、佢哋覺得隻兔仔係揼緊麻糬呀～呢個咁微妙嘅分別我覺得好得意！
3）香港小朋友賞月玩燈籠、日本小朋友做「賞月小偷」（お月見泥棒）
香港小朋友一般都係玩燈籠、賞花燈、同大人賞月玩蠟燭，但係日本，佢哋嘅小朋友就有個好似日本Trick Or Treat嘅遊戲玩，就係要做「賞月小偷」。聽講呢個習俗而家得返某啲地方嘅小朋友會玩，佢哋會拎住支有針嘅長棍徘徊屋企附近，去偷人哋屋企嘅賞月糰子同祭品，仲話偷到越多就越幸運，而呢個「偷嘢」嘅行為只有呢日先會被原諒添，啲大人甚至會特登放喺啲易攞嘅地方比佢哋拎走。
順帶一提：唔同形狀嘅月亮係用唔同嘅日文去形容㗎！想知嘅話可以參考呢個表：
祝大家連假玩得開心！中秋節快樂～
About Post Author
