首先，如果想睇完整介紹，記得睇埋上面條片啊！
今日要同大家介紹嘅地方就係連地道東京上班族都會推薦，有美食得嚟仲係搭訕成功率最高嘅地方：惠比壽橫丁！
▼喺呢個惠比壽橫丁入面有大概20幾間餐廳，全部都係好似日式屋台同居酒屋嘅設計。
位於涉谷區惠比壽，好多上班族放工都會同同事呀上司下屬飲酒吹水食飯，遊客反而好少嚟呢！
而今日我哋要介紹嘅就係入面一間好出名嘅「肉壽司」！
▼當日我哋6點幾鐘去到已經非常墟冚，所以建議大家唔想排隊記得早啲去食呀！有啲日本人5點半就放工架喇。
一般遊客去日本一定會食魚生或者海鮮壽司，而呢度就係食肉獸嘅天堂喇！因為佢嘅主打都係唔同肉類嘅壽司，包括牛、鴨、豬、甚至馬肉，有生有熟，款式繁多！除咗壽司仲有伴酒小菜、炸雞等等。
▼每檯都會有一碟免費前菜：味增茄子
▼熟馬肉壽司：270Yen
▼煙薰鴨壽司：230Yen
▼韓式牛肉壽司：～200Yen
▼生馬肉壽司：180Yen
啲嘢唔單止好食，仲要非常值得「呃like」。賣相非常唔錯！
▼呢塊炙燒牛肉壽司真係不得了，店員會拎到你面前即場用火燒，超級正。
▼[名物！！さしとろ] 肉寿司
用日本國產牛製成 肉壽司名物：盛惠880Yen
當中飲料menu入面竟然畀我見到有杯叫「色色桃味汽酒」嘅cocktail，特別在佢係專門俾男士點俾同枱或隔離枱覺得佢靚女嘅食客！根本就係光明正大畀人溝女用。
惠比壽橫丁入面其實位置空間唔大，但就因為迫夾反而營造咗一陣親近嘅感覺。飲多兩杯之後無論男女都會開始大膽，所以好容易可以同隔離枱嘅人傾埋一份乾杯埋。我仲親眼目睹有個model咁靚嘅女仔一出廁所就俾男仔搭訕添！當然，如果你係唔鍾意俾人搭訕，無視佢哋、或者講廣東話都得㗎！反而因為上班族多，有啲人英文都流利添！
結果我哋當日都有俾人叫停一齊飲酒。但女仔們就要記得小心知道自己嘅酒量係幾多（因為佢哋真係會一路請你哋飲）。不過同我哋飲嘅有男有女，其實傾得幾開心，有時識下新朋友聽下佢哋嘅人生經歷都幾有趣架！男士們如果想搭訕就記得袋定多啲錢請人飲酒用喇～
About Post Author
