![[菜鳥又中伏]掛羊頭賣狗肉嘅One Piece逃出遊戲](https://www.likejapan.com/wp-content/uploads/2016/08/thumbnail/1924_20160809100945.jpg){kind=small}
講到日本而家動漫界嘅大哥大，唔洗問阿桂都知道係《One Piece》海賊王啦！所以日本好多地方都可以見到《One Piece》同其他品牌／商場等等cross over，而今日Mika就嚟到Tokyo Dome City 參加由＜リアル脱出ゲーム ＞X＜One Piece Film Gold＞合作嘅《One Piece：從黃金遊園地脫出》嘅脫出遊戲！結果……
![[菜鳥又中伏]掛羊頭賣狗肉嘅One Piece逃出遊戲](/2016/09/editors/1008/20160905125750_4Nz6kaNk.jpg)
其實事身已經上網睇過個官網，不過個網到冇咩點講過成件事係點玩……因此Mika唯有身先士卒，試玩一下！
嘩，平日下午2、3點都有咁多人排住隊，仲唔係有正嘢！
見到個入口裝橫咁堂煌，我諗大家腦海入面都想像到入面有好多野玩、好多嘢睇、同埋好多打卡位啦～（夏日炎炎係特別對冷氣房有太多不切實際嘅幻想w）
最後……入去睇咗後簡介短片（唔夠5分鐘，全日文不過因為有動畫唔太難明），大家一齊叫吓口號，就返出嚟同陽光玩遊戲啦（汗）
![[菜鳥又中伏]掛羊頭賣狗肉嘅One Piece逃出遊戲](/2016/09/editors/1008/20160905125750_Ia6BSgeL.jpg)
今次脫出遊戲個故事背景是咁的（超級簡化版）：
係依個遊樂場入面，有一筆沉睡咗N年嘅10億貝里巨款！大家要深入樂園入面仔細留意有冇咩蛛絲馬跡，解開謎題，帶住10億貝里逃出遊樂園！
![[菜鳥又中伏]掛羊頭賣狗肉嘅One Piece逃出遊戲](/2016/09/editors/1008/20160905130219_Fg8CSTUo.jpg)
啲謎題係點㗎呢？大概就係好似依題咁～（唔好問我答案……菜鳥係解唔出答案嘅）
![[菜鳥又中伏]掛羊頭賣狗肉嘅One Piece逃出遊戲](/2016/09/editors/1008/20160905125750_TPu34yKz.jpg)
謎題隱藏咗係樂園入面嘅各個地方，而當中大部分都係你唔玩過山車啊、滑浪飛船之類就唔會見到謎題嘅！
樂園負責人話只要你花時間，玩多幾次，睇多幾次，係一定可以解得出晒所有謎題，但就可能需要5、6個鐘頭左右，瘋狂地玩機動遊戲先得！
問題嚟啦：如果你冇買到一日pass，普通飛只係包你玩5次機動遊戲，萬一miss咗睇唔到要坐多幾次，就要額外課金……（所以醒目仔就一定要買day pass 啦，下面再講點買！）
仲有就係，如果你唔識日文，well，除非你係天才，如果唔係我都幾確信你係唔會解得出啲謎題嘅！
雖然佢仲推出咗小朋友版本，但對外國人嚟講都並唔係貢容易啊……
如果你好似Mika咁推理又唔勁，日文又淨係得N3N2，咁……我覺得你會同我一齊，中伏囉……
![[菜鳥又中伏]掛羊頭賣狗肉嘅One Piece逃出遊戲](/2016/09/editors/1008/20160905125750_I8j9ItBm.jpg)
好啦講完有咩伏，不如講吓有咩得意野啦！
原來星期六日去玩嘅話，只要比540yen就可以製個咁得意嘅紋身公仔係面／手臂／手腕到！
我好好好想整啊！！！！偏偏唔係星期六去，好失望（哭哭）
（重點係帶住我玩個個工作人員係咁話今日有今日有，係咁老點我係三十幾度高溫下去依到搵去個到搵，而其實根本係冇！冇啊！從來都沒有啊！）
![[菜鳥又中伏]掛羊頭賣狗肉嘅One Piece逃出遊戲](/2016/09/editors/1008/20160905125750_Ib9Ypv5j.jpg)
仲有就係佢地啲野食都好得意！例如魯夫嘅草帽同索隆嘅愛刀麵包～～～～
![[菜鳥又中伏]掛羊頭賣狗肉嘅One Piece逃出遊戲](/2016/09/editors/1008/20160905125750_hrwuHeHd.jpg)
仲有講到明唔辣嘅草帽咖喱飯㖭啊！
![[菜鳥又中伏]掛羊頭賣狗肉嘅One Piece逃出遊戲](/2016/09/editors/1008/20160905125750_i0r4GK3M.jpg)
商品有依個tote bag（真心覺得正）！
![[菜鳥又中伏]掛羊頭賣狗肉嘅One Piece逃出遊戲](/2016/09/editors/1008/20160905125750_RHSkXlew.jpg)
同埋Chopper嘅毛巾！好可愛啊～～～很想要～
![[菜鳥又中伏]掛羊頭賣狗肉嘅One Piece逃出遊戲](/2016/09/editors/1008/20160905125750_U0NhiWrW.jpg)
講到尾，成件事只不過係去遊樂場玩，順便有啲謎題比你解吓咁……（真係超級咁順便囉）
令人失望個位係，我想像樂園入面就算冇整到啲咩嘢大製作《One Piece》布置都好，起碼都會有幾個紙牌公仔比我地打下卡呃吓like啩！
可惜佢原來就真係淨係得廣告寫住個個成個人咁大嘅金色魯夫像，其他咩都冇……係咩都冇啊！
結果sad到我係旋轉木馬自拍自娛吓算數……
最後我要唱多一次：原來沒有～從來都沒有～～教我緊張得心跳這麼久～
![[菜鳥又中伏]掛羊頭賣狗肉嘅One Piece逃出遊戲](/2016/09/editors/1008/20160905130410_AfxoeBY8.jpg)
好啦，發咗一大堆牢騷，但我都唔排除仲係有人想買飛去玩嘅，所以依到同大家講吓有咩買飛心得～
下圖左邊係預先購票，可以係Family Mart、Lawson售票機到買到，由於預先購票係平啲嘅，而且只要係之前一日下午6點前就可以買到，所以Mika強烈推介大家預先購票！亦因為淨係買5次機動遊戲券係唔夠解開晒所有謎題，所以推介大家買粉紅色嘅ONE DAY PASS~~~
![[菜鳥又中伏]掛羊頭賣狗肉嘅One Piece逃出遊戲](/2016/09/editors/1008/20160905125750_lpdCKu2I.jpg)
官網在此，有興趣可以上去睇下段預告～～
真係一路打blog一路一殼眼淚……希望下次可以成功介紹到啲超好玩嘅嘢比大家，等我可以擺脫菜鳥嘅臭名啦～
PS.段片到本身我想講be ri（貝里）點知讀錯咗做ba ri！So ri！
我會返去再潛修日文！今次真係byebye啦～
About Post Author
