去大阪除咗行街 shopping，食野之外，原來仲可以參觀吓工廠！好似我呢啲咁好學嘅人，決定去喺吹田嘅 Asahi 工廠見學一吓，因為 Asahi 啤酒真係好好飲，竟然有機會可以去朝聖～
嗱，我絕對係為咗欣賞 Asahi 啤酒嘅製作過程！唔喺因為果 20 分鐘啤酒任飲嫁！我唔會話俾你知果度有啤酒免費任飲嫁～
地址：大阪府吹田市西の庄町1-45
電話：06-6388-1943
費用：免費
為咗今次見學，出發就要申請定，不過個 tour 喺免費嘅，申請網址
其實都幾 full，建議早啲申請定，如果唔係就得返啲朝早嘅時間，我就申請咗十點…
搭 JR或者阪急線去到吹田站，再行大約十五分鐘就可以到
我係梅田去吹田大約三十分鐘左右
其實一落車好快就會見到，不過行過去入口都有一段距離
沿途都有路牌指示
終於入到嚟喇，首先登記返一啲資料
職員會講解個見學流程，首先睇十分鐘影片，再去參觀工場 40分鐘，最後就係試飲 20分鐘
唔識日文唔緊要，佢知你係外國人就會俾翻譯機你，有英文／國語
十分鐘影片，都係睇吓啲日本人有幾認真，專業果啲野啦
40分鐘嘅 tour, 就由歷史講起
當然會介紹啤酒用料
邊種啤酒用邊種麥等等，呢隻仲可以試食。原來諗住係無味，食落去口感幾似花生，仲有一陣麥芽味，幾好食喎![大阪吹田 Asahi 工場見學體驗之旅！]()
然後就介紹製作過程，入樽等等，其實同以前細個參觀可樂廠情況差唔多![大阪吹田 Asahi 工場見學體驗之旅！]()
呢部機好快咁封蓋，咁樣就唔會比空氣入去喎，真係轉得好快
最後仲有個世界啤酒 collection~
真係有好多好多啤酒…我識嘅得好少好少![大阪吹田 Asahi 工場見學體驗之旅！]()
跟住就嚟到試飲時間，20分鐘～任飲！
生啤有三款，原味、黑啤同埋濃味，同埋有大量唔同味嘅罐裝 Asahi，不過好多便利店都會買到，所以主力都係飲生啤啦～
呢杯係原味，唔知係心理作用定點，呢杯 Asahi生啤的確比酒吧嘅生啤好飲！
泡沬好似有啲牛奶咁甜，啤酒勁滑，仲要冰凍，真係好好飲！
而至於濃味，泡沬同原味一樣似牛奶，酒味就真係比較有麥味，至於酒精味就唔多，都好飲～
可能係我慢慢享受既關係，飲完呢兩杯已經夠 20分鐘，要離開了![大阪吹田 Asahi 工場見學體驗之旅！]()
不過果陣神早流流都係唔好飲咁多好～
呢個見學團都幾好玩嘅，不過就要專登去吹田呢個比較偏嘅城鎮，雖然吹田都係一個舒服嘅地方～
過程真係好似細個去可樂廠，我去內蒙嘅蒙牛廠咁囉，大同小異。而試飲啤酒都幾吸引，生啤真係好好飲～
你有興趣就申請去啦～
About Post Author
