我相信好多人都同我一樣，對忍者嘅認識唔係嚟自《火影忍者》就係嚟自《甲賀忍法帖》，簡單嚟講就係二次元世界囉。
不過早排我去大阪旅行，喺以下依間日本最大型嘅戰國、和裝小物專門店「忍屋」逛完一圈之後，就發現原來想成為三次元世界嘅「忍青」，其實唔難！（而其實明明東京今年都開咗忍屋……）
若要成功，必先練功！不過想做忍者第一步緊係唔係練「多重影分身」，而係擲手裹劍！「
忍屋」有嘢睇、有嘢買又有嘢玩，一次過滿足你三個願望～係咪好開心呢～
300yen（廿蚊左右）可以擲1回，每回有5次機會～想玩就入錢入去拎券玩啦～
好啦，擲擲擲擲完一輪之後可以換咩禮物呢？答案就係相入面嘅膠手裹劍、金幣、苦無之類～
店主特別提大家依個係用嚟換嘅禮物，你地班人唔好詐傻扮懵拎嚟擲啊！
不過望向精品部依邊，啱啱個硬膠手裹劍係有得買嘅，仲只係需要99yen……7蚊……會唔會太平啊！
不過啱啱?個咁硬膠，你當我細路仔玩泥沙咩！工欲善其事，必先磨其器，我要睇啲勁啲嘅武器囉唔該！
例如……依啲？（我其實唔會敢拎起佢fing）
好啦冇咁大個頭我唔會戴咁大頂帽，都係依個苦無比較啱我！
不過苦無買得一枝係完全唔夠嘅……唔通你每擲完一個就去抆返出嚟再擲咩……會唔會太傻豬豬啊？
所以計我話一係就唔買，一係就買夠一套，有苦無又有手裹劍！
買完武器就係時候裝身啦！人靠衣裝吖嘛～一見到新選組腦入面就馬上浮現《銀魂》嘅畫面……
沖田！近滕！求吓你地永遠都唔好完啊／0＼
衫都唔算特別，依對忍者鞋先係重點！唔洗200蚊就可以做火影……對鞋，抵啦！
再加埋依個仮面就可以變身為史上最殘酷嘅暗部！（諗起少年卡卡西個段真係好虐心啊）
唔想咁浮誇嘅可以揀著T-Shirt～
再加埋依條忍者頭巾（其實係毛巾），包保所有人都會對你投以羨慕嘅目光！
除咗自己要型之外，汪星人一樣唔可以鬆懈！狗狗著到咁真係好鬼死型啊！
跟住就睇下啲精品先～估吓左邊個把公仔劍有咩特別？
……
……
答案係禁落去會有咇咇聲wwwwww（好無聊但都唔少人鍾意㗎！）
新選組「最後的武士系列」名刀擺設～放係書枱上面，馬上生活品味UPUPUP！
依個系列有4個唔同人物嘅版本～土方同沖田我真係揀唔到啊／0＼
另外仲有啲比較女仔向嘅不倒翁！好得意啊～～～儲齊一排應該會好有趣～
最後嚟睇下啲比較實用嘅送禮佳品啦～
首先有……「我最唔想收到嘅手信」排行榜第一名－－杯！
不過如果係咁得意嘅杯我相信收到都係開心嘅！
接下來比較雜不冷……有我比較對電話殼同符感到興趣～
忍者著到成身黑蚊蚊，如果唔擁有一排亮白牙齒大家就會睇你唔到！所以……買枝牙刷啦！
忍者們個護額會搞到啲陰扁噠噠，辛苦GEL好嘅髮型亦會受到不能修補咁傷害……所以～買梳啦大家！
最後壓軸出場嘅，係相信大家每次去日本旅行都有見過嘅武士刀遮！依款仲有揹帶，幾方便啊～～～
如果身邊有朋友鐘意戰國／忍者嘢，又或者如果你的朋友就是你，我強烈推介你嚟逛下～冇介紹錯㗎～
有興趣可以上忍屋個官網睇下～下次再帶大家去買嘢～拜～
About Post Author
