TOKYU HANDS出名多家品，早排就比我發現咗依個成舊蕃薯咁款嘅燴蕃薯神器（約$16X），聲稱只需8分鐘就可以燴熟2條大蕃薯，我緊係即刻買返去試下！
個煲有分大同細size，大size可以一次過整2條蕃薯，我一個人住邊到食到咁鬼多蕃薯吖，買個細嘅就夠晒數～
係咪好得意呀！真係成舊蕃薯咁嘅樣！
入面有一包依D珠仔，相信係成個煲嘅重點（有D似呀媽用黎種花個D珠仔……）
燴蕃薯做法非常簡單！
1.洗乾淨D蕃薯，抹乾D水之後放係D珠仔上面。
2.將成個煲放入微波爐，細細條蕃薯就叮4分鐘，大條嘅話就叮完4分鐘拎出黎望下夠腍未，未夠再叮4分鐘。
3.叮完之後個煲係熱到呀媽都唔認得，記得記得用手套拎出黎！
4.打開個蓋時小心D蒸氣會整到手，最好就用個夾夾條蕃薯出黎啦，不過我依D窮學生邊有夾丫，用叉算數……
5.搞店晒自己放入口，唔洗人教啦掛～～～～
上次我整細細條蕃薯，4分鐘就已經腍晒！朝早趕住返工當早餐簡直一流！
美中不足係有少少乾，不過都可以接受～
想食甜品嘅可以試下整熟晒條蕃薯之後，放幾粒綿花糖係舊蕃薯入面，再叮多十幾廿秒～
一叮完拎返出黎：嘩！D綿花糖溶溶地，濕濕地，完全彌補咗個蕃薯少少乾嘅不足！正呀！
個煲除左整蕃薯之外，仲可以整薯仔、粟米同茄子～
所以我就發揮我嘅小宇宙，燴左條蕉一分鐘！
結果就變成「焦」了……
近珠珠個邊完全濃晒，但放上面個邊就冇咩分別，亦都唔算太熱，只係暖暖地。
切開入面，同普通蕉冇咩分別……只係少少暖，一D都冇變腍……
一個字：失敗！
唉，講到明係燴蕃薯神器，我都係乖乖地拎黎緊蕃薯算啦～～～
想買嘅朋友可以去TOKYU HANDS到入貨～
全日本都有分店㗎！
想睇分店資料？禁我啦！
About Post Author
