▼要數大阪必去嘅景點，黑本市場都算係數一數二，而黑門市場又稱大阪人嘅廚房，係大阪「日本橋駅」10號出口一出就見到～黑門市場大部分商店9:00AM先開門，所以大家唔需要太早7,8點就去到～
▼今次已經係我第三次黎到黑門市場，老實講，黑門市場嘅野食並唔係全部都好味，綜合我嘅經驗，我會推介你以下3款食物！
黑門市場三大推介：1.丸善神戶牛
店名：丸善食肉店
地址：大阪市中央區日本橋2-11-2
電話：06-6537-9229
營業時間：9:00～18:00
休息日：全年不休息
網址：http://honyaku.j-server.com/LUCKUROMON/ns/tl.cgi/http%3a//www.kuromon.com/shop.php?id=245&SLANG=ja&TLANG=zhb&XMODE=0&XCHARSET=utf-8&XJSID=0
▼丸善食肉店店面，其實係一間好細嘅店，門口有一排迷你長枱同4個座位，我今次去個時本身係冇人食嘅，但當我一坐埋去呢，就勁多人相繼幫襯XD
▼我點選左呢款2000YEN嘅神戶牛食，冇記錯係全店最平個隻，神戶牛大家都聽過啦，係一種好貴嘅食材，所以2000YEN可以食到算係一件超值嘅事！
▼有BUDGET嘅話可以揀選再貴嘅神戶牛，有好多唔同款式
▼似乎好多名人都幫襯過
▼揀選完之後師傅會即場係你面前煎
▼分量唔算好多，得10塊
▼可能呢塊神戶牛係薄左啲，但唔好睇少佢，我食第一啖已經雙眼發光了，油脂豐富而不腻，絕對有」入口即溶」嘅感覺，好好味呀，再配合埋旁邊嘅鹽食，仲好味呀！2000YEN已經咁好味，我想像唔到再貴係會好味成點，我真係冇誇張，神戶牛真係好好味！
我都曾經去過神戶食神戶牛，個一餐都係令我好難忘，神戶牛真係無敵，但個一餐係超過7000YEN，而家可以以2000YEN食返呢種美妙嘅感覺，我覺得真係好抵！
▼煎完仲會比返張神戶牛嘅證明卡你，證明呢塊係無花無假嘅神戶牛。
黑門市場三大推介：2.壽司刺身
店名：黑門三平
地址：大阪市中央區日本橋1-22-25
電話：06-6634-2611
營業時間：9:00～18:30
休息日：全年不休息
網址：http://honyaku.j-server.com/LUCKUROMON/ns/tl.cgi/http%3a//www.kuromon.com/shop.php?id=197&SLANG=ja&TLANG=zhb&XMODE=0&XCHARSET=utf-8&XJSID=0
▼黑門市場其實有好多商店都有買壽司刺身，我每次黎都會食，而黑門三平係人氣最旺嘅一間，刺身海產供應最多，價格亦都相宜，雖然而家呢間店都係比遊客攻佔，但真係不得不認同佢嘅壽司刺身係好新鮮～
▼有唔同嘅壽司租合選擇，除左壽司，仲有長腳蟹
▼當然唔少得海膽啦，但呢啲一板海膽我冇試，因為太貴啦，但我有試到即開即食嘅海膽，詳情睇埋落去啦～
▼極上大拖羅，早知揀呢盒XD
▼最後我揀左呢盒價值2000YEN嘅大拖羅＋三文魚雙拼壽司！
▼黑門三平其中一個受觀迎嘅地方係入面有座位＋有免費WI-FI
▼開餐啦，個拖羅超肥美，又係入口即溶，全舊都佈滿油脂，真係好好味！
個三文魚都唔錯，但拖羅大比數勝出！
▼睇我個樣咁滿足就知有幾好味啦～
▼比個近鏡大家睇下佢有幾肥！！
黑門市場三大推介：3.石橋關東煮
店名：石橋食品
地址：大阪市中央區日本橋2-2-20
電話：06-6632-0433
營業時間：9:00～18:30
休息日：星期日，節日
網址：http://honyaku.j-server.com/LUCKUROMON/ns/tl.cgi/http%3a//www.kuromon.com/shop.php?id=103&SLANG=ja&TLANG=zhb&XMODE=0&XCHARSET=utf-8&XJSID=0
▼我第3個推介就係呢間石橋關東煮，關業已經40年啦～
▼佢間店主要係售買家常小菜，好多日本主掃都會光顧，但當中最出名都係呢盤熱辣辣嘅關東煮！
▼呢道嘅關東煮係有9款配料，全部都係100YEN，除左牛筋之外。
▼牛筋係要140YEN，佢雖然係貴啲，但絕對係必選推介！
▼呢道關東煮嘅湯底係甜架，好好味
▼最後我地揀左蘿蔔，馬鈴薯，油豆腐，竹輪同埋牛筋；店員仲會好好咁幫你剪開細細舊！
由於湯底已經有甜味，煮到啲材料入晒味，所以係絕對唔駛加醬料架！
▼加錢都要點嘅牛筋，好腍好好味，口感一流！
▼油豆腐都係好好味，索晒個湯底，好入味，正爆！
▼但要數超級無敵必點配料，一定一定係蘿蔔，我真係好中肯架，因為平時嘅我係唔食蘿蔔，但呢道嘅蘿蔔真係好入味，而且又腍又鮮甜，一啲渣都冇，包你一試難忘！！！相反馬鈴薯就冇咁腍，但都係好味嘅。
－－－－－－－－－－－－－－－－－－
推介以外：
▼其實本身我仲有一個推介，就係呢一間嘅即開即食海膽
▼ 1200YEN一隻
▼店員幫你即開比你即食～
▼我真係試過，雖然甜味欠奉，但真係好新鮮，好味過香港食到嘅好多。
但點解我最後唔推介比大家呢，因為我之後去左北海道食，發覺相差太遠了，北海道個啲係又新鮮又甜，可以話香港同黑門市場嘅海膽係無得比；但北海道同黑門市場嘅海膽又係一樣無得比，一山還有一高，但如果你暫時冇機會去北海道又想食海膽我都建議你黎黑門市場食嘅??
▼蠔嘅情況同海膽一樣，食過北海道個啲真係返唔到轉頭，遲啲我會介紹一下北海道嘅魚市場，繼續留意?
－－－－－－－－－－－－－－－－－－
送大禮時間：
今次送出2款好具日本特色嘅扣針，想要嘅就跟步驟參加拎走佢啦～
1. 讚好LikeJapan Facebook專頁
2. 註冊成為LikeJapan網站會員
3.瀏覽此博客文章時，點選左方的「分享博客文章」以獲得分享連結
4. 會員可透過各大社交平台及討論區分享連結網址，LikeJapan會統計每條連結的點擊次數，會員也可於博客頁面左方查閱點擊排行榜。
5. 截止時間內的分享連結點擊次數愈多，獲獎機會愈大。如有會員的分享點擊數目相同，將根據系統紀錄最快達到該點擊次數的參加者得獎。
詳細玩法亦可參考此頁!
＊如有任何爭議，LikeJapan將保留最終決定權。
About Post Author
