嚟過東京咁多次，每次都淨係留係市中心點都覺得唔夠喉嘅～今次就特登嚟到有「小江戶」之稱嘅埼玉縣川越市嚟感受下慢活遊。唔嚟親身睇到唔知原來呢度真係好有古時候嘅日本風味，直到有少少覺得自己好似拍緊啲時代劇咁呀！
睇以下行程推介之前強烈建議大家睇咗上面條FULL VERSION嘅遊記VLOG先喔
～～
會更加明白每個地方有咩好睇
由於今次係自駕遊喺東京過嚟，到達嘅時候已經係差唔多12點（體驗慢活嘛XD 遲少少唔緊要啦）。於是一落車即刻搵嘢食先～
餐廳推介：甘味茶房かすが
地址：埼玉県川越市幸町6-1 りそな銀行川越支店北側
營業時間：10:30～18:00 （ランチ営業、日曜営業）
見到呢度寫住有川越名物就衝左入嚟，原來呢度係一間開咗120年嘅名店，入面嘅湯麵（素麵）係用蕃薯整㗎！除咗set lunch之外，呢度仲有好多日式甜品同好出名嘅醬油燒小丸子～仲勁多明星嚟食過，而且可以買住一邊行一邊食。
我就點咗東西合璧番茄湯素麵set，配埋杯冰抹茶，超好食！中意嘅可以落埋芝士粉，有一刻覺得自己好似食緊有湯嘅pasta。我係一個超鐘意食番茄湯味嘅嘢嘅人，所以真係覺得超滿足xD
結果仲叫埋小丸子食，不過食一粒已經濟濟地(´_ゝ`) 建議一串兩個人分都得。
食完之後就即刻行吓附近嘅古街。
「蔵造りの町並み」
唔講唔知，其實呢條街係明治時期建設，並非江戶時代。明治26年一場大火將成個川越街道燒剩3分之2，所以其實大部分都係事後重建嘅。不過呢度條街好闊，所以行得好舒服！
行到一半就會見到呢個高高嘅鐘樓！
「時の鐘」基本上可以話係川越最具代表性嘅建築物。據說係400年前由川越酒井家二代酒井忠勝建成。同樣經歷過川越大火，依家已經係第四代嘅重建，仲係用機械去敲響嘅添！每日響4次，分別係早上6點、正午、下午3點同下午6點，自400年前起就已經用嚟提醒市民時間～不過我去嗰陣樓下仲裝修緊，不過都可以行入去小神社影下感覺照XD
行到差唔多街尾，記得轉入左邊嘅橫街，就會搵到非常出名嘅「菓子屋橫丁」！
菓子屋橫丁
地址：埼玉県川越市元町2丁目
呢度充滿住賣懷舊糖果嘅街，啲舖頭有種舊式香港士多嘅感覺。中意食糖嘅朋友不妨夾下糖或者買下手信，會見到好多童年回憶架！
仲被我發現呢個謎之1億Yen xD 包裝有個日式蛋黃醬公仔，唔知到底係咩呢？
行番去大街途中會見到好多謎之動物像。真心係一個謎，正所謂藝術嘅野我識條鐵，但就真係有好多係附近，歡迎大家尋寶。
建議大家離開大街前去街尾嘅川越郵政局，呢度可以直接買Postcard、郵票，寫完又可以即刻寄出，非常方便！
川越元町郵政局
地址：埼玉県川越市元町２－２－３
營業時間：09:00～17:00
睇夠大街就可以去參拜出名求姻緣嘅冰川神社。
冰川神社
地址：埼玉県川越市宮下町2-11-3
聽講呢度真係超靈，每朝開門都會免費派發20粒守過祝福嘅結緣石俾信眾，於是吸引好多少女誠心等候，而且好快就會派曬！真係想拎就真係預早啲時間嚟啦！不過我就揀咗傍晚時間先嚟，反而舒服啲同埋可以影多啲背景無人嘅靚相XD
參拜過程同好好玩嘅求籤釣魚遊戲就睇我條片啦！不過必須同大家分享呢到呢個繪馬迴廊真係好宏偉，同埋影相超有feel！
喺川越大半日大概都可以行到咁多地方，加上呢度舖頭收得早，所以建議大家可以早啲嚟早啲走～如果想多啲川越景點推介，可以參考埋其他LikeJapan嘅文章
（例如呢篇同呢篇）
祝大家玩得開心！
About Post Author
