胃食日本一直以來帶大家係東京周圍食，今次就衝出東京，一連四集帶大家去到四國的香川縣繼續食！
第一集就帶大家去食香川縣特產「橄欖牛」！
日本和牛之中的松板牛，近江牛，神戶牛大家都應該好熟識，但「橄欖牛」唔知大家又有冇聽過呢？
今日嚟到「さぬき焼肉庵 じゃぽん」同大家試食「橄欖牛」！餐廳位置十分便利，距離片原町站徒步大約5分鐘路程。
店入面的座位大部分都係4-6人枱，所以都可以坐得舒舒服服咁慢慢燒，而且係無煙燒肉，所以食完都唔會怕成身都係燒肉味。點餐後大約5分鐘內就會上肉，店員都係一貫日本貼心服務。
餐單方面牛肉種類尚算齊全，有里脊肉(ロース)、五花腩(カルビ)、橫隔膜(ハラミ)、牛舌(タンブツ)、里肌肉(ヘレ)提供。記得要有「特選」字樣的先係橄欖牛嚟㗎。牛肉以外亦提供內臟類、豬雞類、韓式炒飯、冷麵等等料理。
今次小記揀左三款部位試食，想食脂肪比較多嘅就可以揀里脊肉同五花腩，脂肪比較少嘅就揀橫隔膜。(圖中為2人份，價錢為含税)
左上：特選和牛ロース(¥1480) 特選和牛里脊肉
右上：特選和牛カルビ(¥1200) 特選和牛五花腩
下：特選和牛ハラミ(¥1200) 特選和牛橫隔膜
「橄欖牛」雪花分佈平均，咬落去口感好軟嫩又多汁，唔洗點咬都已經會融化喺口入面。
肉香同肉汁亦都非常濃，而且唔會好膩，非常美味。
佢哋仲有特製醬汁又或者鹽可以點（雖然本來都已經有少少調味
），想食濃味啲嘅就點醬汁，唔想咁油膩嘅就點鹽，各有一番風味㗎！
肉類以外嘅選擇有海鮮拼盤(¥800)，沿海嘅香川縣所出產的海鮮都好新鮮。
海鮮拼盤種類豐富：有蝦，魷魚，章魚，帆立貝等等（圖中為2人份量）
由其係個帆立貝又大粒又夠哂鮮味。
さぬき焼肉庵 じゃぽん
營業時間：16:30～凌晨1:00（星期日休息）
地址：香川県高松市古馬場町7-7 宇野ビル１Ｆ
交通：高松片原町站徒步大約5分鐘
除左留意Like Japan，仲可以參考 香川縣香港Facebook，就可以得到更多香川縣嘅資訊啦！
咩係橄欖牛？
「橄欖牛」(オリーブ牛) 係將有100年歷史嘅香川小豆島特產橄欖同喺瀨戶比較溫暖嘅氣候同風土中飼養嘅讚岐牛結合 ，
用榨油後營養豐富嘅橄欖果實作為飼料餵食牛隻，而變成嘅新高級和牛「品牌」。
讚岐牛肉質比其他和牛比較柔軟，而且營養豐富，會比起其他和牛可以食得更加健康，食咗橄欖嘅讚岐牛令肉質更加好，有抗酸化作用，可以淨化血液，有抗老化嘅效果，女士們都非常適合～
而讚岐牛嘅等級本來亦都已經係3級以上（最高級Ａ５級亦包含在內），所以食咗橄欖嘅讚岐牛，姐係「橄欖牛」嘅味道一定有保証！
About Post Author
