![[不敗日記]帶你去歌舞伎町搵靚仔牛郎](https://www.likejapan.com/wp-content/uploads/2016/05/thumbnail/1120_20160519164217.jpg){kind=small}
今次不敗妹帶大家嚟到位於新宿嘅歌舞伎町，唔係靈探～
日光日白有咩好靈探～咁就梗係去牛郎店啦！
何！？唔係呀fa！？講真！？梗係啦！珍珠都無咁真呀！
相信有唔少女仔同我一樣，成日睇漫畫、日劇同電影講歌舞伎町，又講到d牛郎好靚仔，成個王子咁！
唔多唔少都會憧憬自己變成公主同牛郎傾計飲嘢，甚至係憧憬浪漫嘅事發生喺自己身上㗎啦～
所以，我決定要帶大家去牛郎店！話俾大家知究竟係咩一回事！！！
![[不敗日記]帶你去歌舞伎町搵靚仔牛郎](/2016/05/editors/296/20160519152028_8dLVgUBi.jpg)
（ViViD：Reno, Ko-ki, Shin, IV, Ryoga）
話說，2011年，我因為Cosplay表演嘅關係，所以一連五日嘅動漫節都可以自由出入後台。
而喺8月2日，就俾我係後台遇上擔任表演嘉賓嘅ViViD！
就由個時開始，我鍾意咗ViViD！成為咗バンギャ（Bandgirl）喇！
呢幾年一直衝去日本追live、簽名會、握手會、攬攬會等等，真係好幸福。
可惜，幸福好短暫，係上年，ViViD解散……
原本以為，以後都唔會再見到佢地……
點知，俾我知道咗鼓手Ko-ki喺歌舞伎町嘅牛郎店REALIVE擔任Producer！！！
![[不敗日記]帶你去歌舞伎町搵靚仔牛郎](/2016/05/editors/296/20160519152214_PmIRRqLb.jpg)
當老細叫我不如介紹吓牛郎店時，我私心揀咗REALIVE！（笑）
講個秘密你知吖！其實我去過一次牛郎店㗎喇＞w＜
個次，覺得都幾悶，因為只係好普通咁傾計。
嘛…不過，可能係因為d牛郎唔靚仔，唔係我杯茶，所以我無辦法心心眼，無心跳加速至小鹿亂撞！
今次，唔係賣花讚花香，而係REALIVE嘅牛郎真係堅靚仔！
![[不敗日記]帶你去歌舞伎町搵靚仔牛郎](/2016/05/editors/296/20160519152028_ksv6lwKS.jpg)
一入去，就見到V系Band LAGLESS嘅主音DOG.，即刻心跳加速！
其實，係一年半前，我已經識佢，去過睇佢嘅live，聽佢唱歌㗎喇！
但係無諗過，佢而家變到咁靚仔！喇！唔係話佢以前唔靚仔！而係而家嘅佢完全係我杯茶呀！
![[不敗日記]帶你去歌舞伎町搵靚仔牛郎](/2016/05/editors/296/20160519160453_AjmQIuxg.png)
由受付位置，佢就伸手拖住我，帶我入店！
嘩！佢拖我手個一刻，我嚇咗一跳呀！痴根！
佢拖我手！佢拖我手！佢拖我手！佢拖我手！佢拖我手！（我個腦不停重覆呢句說話N次）
我好想有個時間停止器，等佢永遠拖實我隻手！（無限FF中）
![[不敗日記]帶你去歌舞伎町搵靚仔牛郎](/2016/05/editors/296/20160519160453_r4DWcoTr.png)
嘛…入到店內，同佢坐低落梳化。
佢坐係我隔離，我連望都唔係幾咁敢望佢呀＞w＜
咁其實，傾計嘅過程呢，都係日文對答，內容都係傾吓頭先去邊食飯。
當我話我去咗居酒屋食飯時，佢呆咗，佢話佢都係去咗居酒屋。
後黎，我睇佢Twitter張相時，先知，原來係同一間居酒屋，可能係隔離枱都未定！哈哈！
![[不敗日記]帶你去歌舞伎町搵靚仔牛郎](/2016/05/editors/296/20160519160453_4bdUcO5k.png)
同佢傾傾吓計，佢突然伸手搭住我膊頭，我心跳即刻加速再加速！！！
咁老實講，我d日文未去到達人級數，總會有聽唔明嘅時侯，咁佢都好努力咁用英文同簡單日文向我解釋意思。
所以呢，就算大家遲d去嘅話，都唔洗擔心溝通唔到，大丈夫！！！
咁傾傾吓計，佢就話要行開一陣，要準備一陣表演呀！
吓！？係牛郎店表演d咩！？脫衣舞！？不是吧！？
![[不敗日記]帶你去歌舞伎町搵靚仔牛郎](/2016/05/editors/296/20160523133133_ugZfmxSc.png)
不過，之後見到其他人孭起結他、Bass喺到setting時，先知係準備Live！
原來每晚10點鐘，佢地都會有Live㗎！
幸運地，我坐嘅位置對正舞台位置，當DOG.唱歌時，我完全睇到心花怒放！！！
相比起一年半前嘅佢，舞台經驗多咗，更加投入演唱，完完全全感受到佢內心個份熱情澎湃！！！
![[不敗日記]帶你去歌舞伎町搵靚仔牛郎](/2016/05/editors/296/20160519160828_oGZAfutr.png)
Live後，滿頭大汗嘅DOG.坐返嚟我身邊，見到佢塊面紅哂，佢同我講佢好熱。
由於我太怕醜，唔敢伸手去幫佢抹汗呀！（掩面）
同佢繼續飲嘢，又傾吓計，時間過得好快呀！要走喇……
嘛…真係好唔捨得…好在走前有同佢影合照（心）
![[不敗日記]帶你去歌舞伎町搵靚仔牛郎](/2016/05/editors/296/20160519161545_zSEIo8ZH.jpg)
我將合照放咗上Facebook專頁，大家話我同佢好襯（心心）
嘛…不過，都有人留言話佢個樣望落好老！
其實…佢今年20歲咋！仲後生過我＝ ＝」
好喇！講咗咁耐，係咪心郁郁都想去返轉呢？
等我同大家講講收費先！其實都唔算好貴，因為第一次去嘅話有優惠（心）
第一次去嘅客人，2個鐘，3000yen，已經包哂消費稅同服務費㗎喇！
而且，「鏡月」同「真露」呢兩種酒係任飲！嘢食、香檳同特別飲品就需要額外收費。
講明呀，收得咁平，唔洗諗可以指名任何一個靚仔牛郎一直陪你呀！
佢地會坐低同你傾計一陣，之後就會轉第二個坐落嚟同你傾計㗎喇！
如果第二次去呢，就唔同收費喇！喺無指名嘅情況下，2個鐘，5000yen，消費稅8％，服務費30％，任何飲品另計！！
想指名某個靚仔牛郎一直陪你？得！無問題！加指名費就可以！！！
數數手指…諗一諗…天文數字！！！真係哪有錢！？（淚）
好啦！我放棄喇！去過一次就算喇！等我中咗六合彩先再去第二次啦！
REALIVE
營業時間︰19:00～24:00
休息日︰每週星期三、20日、月尾
電話︰03-6302-1209
地址︰東京都新宿区歌舞伎町2-21-4 三経21ビルB1F
交通︰JR新宿駅東口行7分鐘、西武新宿駅行3分鐘、都営大江戸線東新宿行3分鐘
（註︰第一次來店於入場前需出示身份證明文件）
![[不敗日記]帶你去歌舞伎町搵靚仔牛郎](/2016/05/editors/296/20160519162130_SudcEzdx.png)
其實，我有DOG.嘅Twitter，可以成日留意佢近況（心）
DOG.嘅Twitter︰ https://twitter.com/LAGLESS_DOG
個心好糾結，好想幫佢宣傳等佢人氣高d，但係又唔想佢俾人搶走！（掩面）
相信只有Bandgirl先明白我感受！嗚嗚嗚嗚嗚～～～
![[不敗日記]帶你去歌舞伎町搵靚仔牛郎](/2016/05/editors/296/20160519152028_VqlMBgsb.jpg)
DOG.隊Band，LAGLESS都有唔少Live！
DOG.叫我幫佢隊Band宣傳吓～～
係嚟緊嘅7月8日（五）於高田馬場AREA舉行免費入場One Man Live！
同時，LAGLESS 正式始動！！！
我極道超級非常萬分希望老細派我7月去日本！！！（跪求）
好啦！預告一吓先～下一篇[不敗日記]將會有我同Ko-ki同DOG.同隊友結他手翼嘅訪問！
大家記得要密切留意呀！！！
![[不敗日記]帶你去歌舞伎町搵靚仔牛郎](/2016/05/editors/296/20160519164512_3EWyh6Iw.jpg)
可能大家會有好多疑問，點解夾Band嘅人會走去做牛郎？
究竟呢間REALIVE同其他牛郎店有咩分別呢？
下集[不敗日記]，等Ko-ki同DOG.同翼一齊話俾大家知啦！
仲會大講佢地做牛郎嘅感想！仲有仲有，佢地好想同大家講嘅嘢～
仲有仲有仲有！我嘅Facebook專頁不定期更新，深夜放閃時間！！！
例如好似以下呢一張相咁！
![[不敗日記]帶你去歌舞伎町搵靚仔牛郎](/2016/05/editors/296/20160519160453_cAe4NuoE.png)
唔好問我同DOG.喺到做緊咩呀～
我淨係知我當時石化咗～之後不停心跳加速～小鹿亂撞～
會有好多同Bandman嘅合照㗎！我要閃死你地！哈哈哈！
所以所以！未Like嘅就快d Like，Like咗嘅就記得要Like我d post呀！知唔知呀？
想知究竟我同DOG.做緊咩，就記得睇下集[不敗日記]喇！Bye Bye你條尾～
About Post Author
![[不敗日記]帶你去歌舞伎町搵靚仔牛郎](https://www.likejapan.com/wp-content/uploads/2018/09/1-1471327241-150x150.jpg){kind=avatar}