嚟奧多摩兩日一夜，入住呢間奧多摩嘅溫泉酒店－鳩ノ巣莊！
呢間位於鳩ノ巣嘅溫泉酒店於2015年5月開幕，酒店房間都睇到奧多摩靚景。
呢間就係我間房啦，其實我係book咗一人房嘅，但由於呢度房間設計都基本一樣，係兩床房。一入到呢間酒店已經覺得好新好乾淨，入到房更加覺得好舒適！房間有一個浴室一個廁所，仲有個廳仔，房間幾大可以將個行李打開擺地下都冇問題！
呢度就分男女湯，每個湯入面都有個梳妝間、澡堂、室內湯同室外湯。我係夜晚落去浸嘅，佢啲設備好齊全，毛巾、梳妝用品同洗澡用品都有提供。湯其實就冇咩特別嘅地方，室外湯晚上浸幾好feel，嚟個great night chilling 啦！
今次都有book到早餐同晚餐，個人覺得酒店餐廳嚟講呢間真係好高水平，係呢次入住最大嘅驚喜！除咗服務十分好之外，食物又做到好靚好好味，十分值得嘗試！同埋因為奧多摩好少店舖，如果唔book定酒店嘅餐廳，真係唔知可以去邊度用膳。
呢碟前菜，有芝士、ham同一啲魚生，碟排得好靚，酸酸地嘅食物做前菜十分開胃。
香蝦蕃茄冷麵，麵條爽口，蕃茄鮮甜，好味。因為嗰日去完奧多摩湖同日原鍾乳洞，個人好攰，本來仲諗住酒店嘅dinner應該都係buffet要行嚟行去，但原來係逐樣上菜，坐定定慢慢食，十分嘆。
紫薯豬扒晚餐，豬扒肉質鬆軟，特別喜歡個紫薯。
最後仲有甜品?，係我最鍾意嘅抹茶雪糕！
酒店餐廳有大大塊玻璃鏡，朝早食早餐嘅時候睇風景真係一級享受啊～
早餐都係以上菜形式，逐樣上菜嘅。
酒店餐廳設計簡單，同一般日本酒店差唔多。
＝＝＝＝＝＝＝＝＝＝＝＝＝＝＝＝＝＝
鳩ノ巣莊
地址：Nishitama District, 奥多摩町棚澤６６２
房費：￥10,044～￥18,684/1人
交通方式：
1. 自駕
2. JR- 鳩之巢駅徒步5分
About Post Author
