最近日本周圍都係一片花海！上個月睇完櫻花都未回得切氣，就要趕住去抓住芝櫻的尾巴！如果想欣賞片地螢光粉紅嘅芝櫻，但係又得一日時間趕頭趕命嘅話，Mika誠意推介大家去東京近郊秩父市「羊山公園」嘅芝櫻祭～吓？秩父？咩嚟㗎？係咪山卡啦咁遠㗎？NONONO！由池袋搭特急電車去秩父只係需要一個鐘零三個字，一日遊，very nice～
今年嘅芝櫻祭係由4月23日到5月8日，換句話講依幾日就係最後嘅最後！由池袋駅去西武秩父駅最快就係搭特急電車，車費單程1412yen，唔洗轉車，大約1個鐘3個字就到～
搭JR去池袋之後，係西武池袋札口個邊搵西武池袋線～入閘後去依個紅色特急券櫃枱，就可以買到去秩父嘅特急車飛㗎啦～
櫃枱出面有個mon寫住電車開車時間、有冇空位、停邊個之類嘅資訊。可能係因為我去個日撞正日本黃金周，10點鬆D去到已經冇晒10：30分嘅特急券，大家可能早少少去買定飛會好D！
從櫃枱轉左就見到特急列車！大家千祈千祈唔好去錯另外一個大月台呀！個D唔係特急列車！
冇錯，岩岩講?個大月台就係依個啦！上面明明有寫住特急，但係其實並唔係喺依到上車……唔好比佢呃咗！
BTW，講咗一大輪特急，其實貧窮嘅我係選擇咗搭準急列車嘅！（你睇我幾好！幫公司慳錢呀！）
由池袋搭去飯能轉車再去秩父，加埋1個鐘45分鐘至2個鐘咗右，雖然慢咗半個鐘至九個字，但係就只需要772yen一程，平足一倍，啱晒我地依啲窮學生！同埋因為冇咩人會搭準急去秩父，所以好快就有位坐～～yeah～～～～
係飯能落車之後，月台嘅另一邊就係去秩父嘅電車啦～係咪好方便呢！
終於都到啦！秩父車站入面掛起晒燈籠，好有氣氛啊！
一出閘行兩步就見到依個「芝櫻之丘入園券賣場」，好多人排隊買（包括我）！上到去先發現去到羊山公園門口都有得買，仲唔洗排隊㖭……
大人盛惠300yen～～～
沿住人群行上羊山公園，中間會經過好多好靚嘅地方！
啲水勁清，入面仲有金魚㖭～～～～
係山坡到睇到嘅鳥居串燒！可惜太多人趕住上山，唔好意思停係到合照／0＼
終於都到啦！由車站行上芝櫻之丘快則20分鐘，慢則半個鐘～我覺得唔算太辛苦，相信大家都唔會有問題！
首先睇下我朋友係4月17號影嘅相～～～
一大片螢光粉紅！
仲有粉紫色！唔洗問一定有勁多粉紫控喺到自拍啦！
仲有鬱金香㖭呀！好似去咗歐洲咁！！！
嗰陣啲花仲未開晒，加上又成日落雨，所以我決定遲啲先嚟睇花！點知一遲就遲咗兩個星期……而依兩個星期入面……
一半花已經收咗皮！青蔥小草們更加係風春吹又生！
雖然影咗相，但我覺得放上fb都唔會呃到like，仲好有可能比人恥笑／0＼
除咗山坡上面花圃嘅花係粉紅色之外……
一眼望過去就係一片綠油油……果然「粉紅色＿＿，可遇不可求」係自古以來嘅真理！
最後我決定唔再糾結於粉紅色……你睇其實白色都幾靚吖！
睇完花，一定要去公園隔離個祭り！！！好熱鬧呀～～～勁多小食攤位，另外仲有精品店㖭！過埋8號就冇㗎啦～（請無視白色?個鬼影）
有醃青瓜～
秩父特產燒魚～
另一樣秩父特產－味噌豬肉丼～好食呀！
炸物～～～
不過咁熱就緊係食刨冰先夠爽啦！（唔小心影到同學嘅為食樣㖭！唔洗驚我幫你打個格仔！）
依個係提子＋檸檬味～um我覺得提子味有啲淡，可樂味好食啲！
另外依間雪糕好好食呀！我揀咗士多啤梨＋雲哩嗱味，士多啤梨味唔會重到冚晒啲雲哩嗱味，甜度啱啱好！另外佢唔係軟雪糕質地，而係好似frozen yogurt同雪葩之間咁，總之就係好食啦！（不過溶得勁快，要食得好快！）
除咗食物之外，依到仲有幾間精品攤當，好似依個就係賣handmade木器，另外有啲賣絲巾、袋、雜貨之類嘅攤當，食飽不妨去睇下～
死啦，講咗咁耐都淨係講咗個芝櫻祭㖭！其實秩父仲有好多值得去嘅景點㗎，下一篇話你地知除咗芝櫻祭之外有咩玩啦～～～
待績……
About Post Author
